Окытувшы. Кайбиримиз эсимизде, юреклеримизде бизге билим берген, соны ман бирге ийгиликке, яхшылыкка уьйреткен инсанларды саклаймыз. Олар ким деп сорасанъыз, окытувшыларымыз. Окытувшы деген соьзди Куьнтувар эллеринде уьйкен арыптан язадылар. Сол да дурыс деп эсиме келеди, неге десе кеспилердинъ арасында сыйы маьнели эм уьйкен ис аьрекетти сайлаганлар оьзлерининъ куьшин, билимин, суьйимин саьбийлерге калдырмай савкатлайдылар. Окытувшыдынъ касиетлери – билимлик, ашыклык, аьр заманда да коьмекке келмеге аьзирлик. Сол касиетлери бар окытувшылар шынтылай да кесписине алал деп айтпага болады.
Ленинаул авылынынъ орта мектебинде коьплеген йыллардан бери Камиль Абибулла увылы Бекеев ислейди. Оьзи бу авылда тувып-оьскен, мектебти мунда битирди, сонъында Хасавюрт каласына педучилищеге туьсти. Окытувшы болып аьрекетин Камиль Бекеев Кизляр каласынынъ 3-нши номерли мектебинде баслаган. Сонъ
эр борышын толтырмага кетти. 1992-нши йылдынъ увыт айында Камиль Абибулла увылы Ленинаул мектебине ис дерисининъ окытувшысы болып келди.
Ол НВП окытувшысы да болып иследи. 2024-нши йылдан алып Россия мектеблеринде ОБЗР (Кавыфсызлыктынъ негизлери эм Аталыкты коршалав) дериси киргизилген. Камиль Абибулла увылы бу янъы окув сабакты байырлады. Бу сабак балаларга баслапкы согыс аьзирлевди береди эм ден савлыкка, яшавга кавыфлы аьллерде оьзин кайтип юритуьв керегине уьйретеди. Кыскаша айтканда, дерислерде балаларды согыс службасына уьйретедилер. Камиль Абибулла увылы аьлиги заманда оьтип турган согыс спецоперациясынынъ катнасувшылары ман байланыста исин бардырады. Мектебте СВО катнасувшылары ман йолыгыслар оьтеди,
оларга, аьеллерине коьмек этуьв акциялар озгарыладылар. Балалардынъ алдында йигитликтинъ, коркынышсызлыктынъ коьрими – бизим данъклы аьскершилер.
Оьз дерислеринде Камиль Бекеев окувшыларда патриотизм, йигерлик, эрклик касиетлерин кеплейди. Ол физкультура дерисин де юритеди. Камиль Абибулла увылынынъ окувшылары туьрли ярысларда, конкурсларда, олимпиадаларда катнасып, баргылы орынларды аладылар. «Ак ладья» республикалык конкурсында
онынъ окувшылары 3-нши орынды алдылар. Ийги иси уьшин Камиль Абибулла увылы коьплеген Сый грамоталар ман савгаланган. Янъыларда бажарымлы, билимли окытувшы «Дагестан Республикасынынъ ярыкландырув отличниги» деген атка тийисли болды.
Окытувшы – юректинъ сайлавы. Балалар ман ислемеге, оларды билимлер дуныяга аькетпеге, ойнап-куьлмеге эм соны ман бирге эдаплыктынъ коьрими болмага – баьри окытувшылардынъ куьши ететаган аьрекет тувыл. Камиль Абибулла увылы Бекеев оьз исине алал, соны ис йолдаслары, мектеб етекшиси Кабират
Куруптурсын кызы Аккишиева айтадылар. Соны онынъ суьйикли окувшыларынынъ уьстинликлери де ыспатлайдылар. Камиль Абибулла увылы оьз исинде «Билимлендируьв – байлык, ис – сол байлыкка ашкыш» деген шакырувы астында ислейди. Соны ман байланыста бир таварых бар. Окытувшы дериске сандыкты аькеледи эм окувшыларга айтады: «Окув басланганша, сиз бу сандыкты ашпага керексиз». Балалар сандыкты корсалайдылар. Биреви ашпага алатлар аькеледи, баскасы уьйиннен ашкышлар аькеледи, уьшинши балта ман ашпага суьеди. Тек сандыкты бирев де ашып болмайды. Сол заман окувшылардынъ бириси айтады: «Окытувшы, окып басламайыкпа? Мен коьп киртлерди карарман, кайтип ашатаганын да уьйренермен, соьйтип сандыкты ашарман. Тек соны уьшин мага
заман эм билим керек». Сол заманда окытувшы окувшысын кушаклайды эм айтады: «Сеники дурыс. Билимлендируьв – байлык, ис – ога ашкыш. Тек
билим алып, сиз сол байлыкты алып боларсыз».
Окытувшыдынъ кесписи – сыйлылар санында. Сондай сыйлы кеспидинъ иелерине берк ден савлык, наьсип эм баьри ийгиликлерди сагынамыз.
Г.Бекмуратова.
Суьвретте: К.Бекеев окувшы ман.
