Казан айында биз аьлемет байрамды, эсли аьдемлерге эс этуьв эм сыйлав куьнин белгилеймиз. Бу байрам куьн биз оьзлерининъ баьри куьшин эм билимин халкына багыслаган, яслыгын эм савлыгын оьсип келеяткан несилден аямаганларды оьрметлеймиз.
Ногай районында тек бир куьн байрам белгиленип калмай, ясуьйкен несилге сав ай багысланган. Бу йыл эсли аьдемлер айлыгы бойынша Яшавшыларды социаллык яктан канагатлав орталыгы районымыздынъ авылларында шаралар озгарды. Сол шаралардынъ оьзеги деп Терекли-Мектеб авылында «Абдулла» банкет залында уйгынланган кешликти айтпага болады.
Ногай районында Яшавшыларды социаллык яктан канагатлав орталыгы Терекли-Мектеб авыл администрациясынынъ, Яшавшыларды социаллык яктан коршалав фондынынъ эм спонсорлардынъ коьтергишлеви мен Ногай патшалык саз алатлар оркестрининъ ортакшылык этуьви мен эслилерге байрам кешлигин озгарды.
Шарага согыс спецоперация катнасувшыларынынъ аналары, КЦСОН куллыкшыларынынъ каьр шегуьви мен пайдаланган ясуьйкенлер шакырылдылар. Оларды шара юритуьвши Халк саз алатлар оркестрининъ солисти Рашид Менлигулов хошлады. Шатлык иелерин бу куьн Ногай район аькимбасынынъ орынбасары Рашид Шангереев, Терекли-Мектеб авыл аькимбасы Марат Кулунчаков, Яшавшыларды социаллык яктан канагатлав орталыгынынъ етекшиси Хамидулла Саитов, Яшавшыларды социаллык яктан коршалав управлениесининъ етекшисининъ исин кесек заманга юритуьвши Руслан Заргишиев, Яшавшыларды социаллык яктан коршалав фондынынъ етекшиси Кайтархан Отегенова, Халк саз алатлар оркестрининъ етекшиси Бекмурза Кудайбердиев, С.Батыров атындагы саниятлар мектебининъ етекшиси Анвар Аджибаев кутладылар. Олар ясуьйкенлерге коьп йылы соьзлерин караттылар, тийисли тыншаювда болып, эслилер яшав, танълык эм дурыслык дерислерин беретаганларын белгиледилер эм баалы сулыбы уьшин разылыгын билдирдилер.
Эсли аьдемлерди уьйинде социаллык яктан канагатлав боьлигининъ заведующийи Зарема Оразбаева туьрли кызыклы ойынлар, конкурслар уйгынлады. Ясуьйкенлер ойынлар барысында оьзлери, тийисли тыншаювына дейим бардырган куллыгы акында айттылар, олардынъ сырасында Зарема Исаевнага сосындай яркын,
йылы, коьнъилди коьтерген кешлик уйгынланганы уьшин коьп разылык соьзлерин айтканлар аз тувыл эди.
Эслилерге шаралар озгарувда уьйкен сулыбы бар хатын-кыскаяклы энъ де йылы соьзлер тапты, соравлар берди, эслилер мен бирге йырлады эм бийиди. Боьтен де кызыклы эди ол озгарган сарынлар конкурсы. Шара барысында «Неравнодушные сердца» волонтер куьбининъ белсенли катнасувшысы Нурбике Османовадынъ тилеги
мен, Зарема Исаевна йыйылганларга Аталык коршалавшылары, СВО катнасувшыларына ясырынмага шилтерлер согув исинде кол коьмегин этпеге шакырув этти. Солай болып шатлык иелерин КЦСОН боьлик заведующийлери Менлихан Картакаева, Мукминат Ярикова эм Зарема Оразбаева ортага шыгып кутладылар. Орталык куллыкшыларынынъ каьр шегуьви мен пайдаланган ясуьйкенлер де Майра Котова, Тойбике Кулунчакова эм байрам конаклары Елена Отарова, Зарифа Адисова шыгып, уьйкен разылыгын билдирдилер.
Кешликтинъ ийгилигин РФ ат казанган маданият куллыкшысы, ногай композиторы Яхья Кудайбердиевтинъ домбырада ойнавы, халк саз алатлар оркестрининъ солистлерининъ занъыраган йырлары арттырды.
Ясуьйкенлер суьйиндилер, кувандылар, банкет залын янды йылыткан аьл бийледи, бу кешлик олардынъ эсинде коьп заманга сакланаягына шекленуьв калмады.
Яшавшыларды социаллык яктан канагатлав орталыгы шарады озгарувда карыж яктан коьмек эткен ТереклиМектеб авыл аькимбасы Марат Кулунчаковка, Яшавшыларды социаллык яктан коршалав фондынынъ етекшиси Кайтархан Отегеновага, КЦСОН етекшиси Хамидулла Саитовка, УСЗН етекшиси Багаутдин Тангатаровка, ТИК председатели Зейдулла Аджибайрамовка, РЭС етекшиси Рамиль Муслимовка, «Арсенал» туькенине, предпринимательлер Альфира Караева ман
Изумруд Эдильбаевага, Ногай районы бойынша Россия МВД боьлигининъ куллыкшысы Марина Танбулатовага разылыгын билдиреди.
Нурият Кожаева.
Суьвретте: кешликтен коьринис.
