Караша айынынъ 27-нши куьнинде Дагестан Республикасынынъ Аькимбасы Сергей Меликов дагестанлылар ман Тувра линия оьткерди. Мен сол оьзгеристи «Шоьл тавысы» республикалык редакциясында карадым.
Бизим коьпмиллетли республикамыздынъ басшысы оьз соьйлевин озып турган йылдынъ сырагыларын тамамлавдан баслады.
Бу йылдынъ басыннан алып коьп куллыклар этилинди – «Доблесть гор» программасынынъ баславы, «Знамя Победы» акциясы, согыс госпиталининъ ашылувы эм сондай баска.
Солай ок гуманитарлык коьмеги бойынша информационлык порталы туьзилееги акында да айтылды. Аьр бир аьдем сол порталга кирип, алдышылыктагы аьскершилерге, янъы регионлардынъ тынышлы яшавшыларына коьтергишлев этпеге боладылар. Бу порталда каерде эм кайдай коьмек этилинмеге болатаганы акында
айтылады. Биз шекленмей айтпага боламыз, Дагестан СВО ерине гуманитарлык юк йибератаганлар регионлардынъ ишинде алдыда.
Солардынъ ишинде айырым орынды «Защитники Отечества» фонды тутады. Бу организациядынъ бас борышы – согыс спецоперациясында катнаскан аьскершилерди, дуныядан кешип кеткен ветеранлардынъ кардаш-тувганларын коьтергишлев, социаллык эм баска кепли коьмекти этуьв.
Республика яшавшылары буьгуьнлерде актуальли соравларды бердилер басшыга, баьрисин де кызыксындыратаган маьселелерди коьтердилер. Бу соравлар ЖКХ, йоллардынъ сапаты, савлык саклав, билимлендируьв эм баска тармаклар ман байланыслы.
Тувра линиядынъ бас соравларынынъ бириси – СВО катнасувшыларына эм олардынъ аьеллерине коьмек этуьв. Бу сорав аьр заманда да биринши орында турады. Соны белгилей турып, Дагестан Аькимбасы Сергей Меликов бизим алдымызга янъы борышлар салады. Биз билемиз, ясларымыз кыйынлы аьллерде Аталыгымызды коршалайдылар, сога коьре биз олар ман бирге болмага керекпиз.
ДР Аькимбасы Сергей Меликовтынъ «Тувра линиясы» – дагестанлылардынъ яшавынынъ сапатын ийгилиндируьв ниет пен озатаган оьзгерис. Биз, дагестанлылар, оьз басшымызда шексинмеймиз, сол сеним бизге оны коьтергишлемеге, салган борышларын толтырмага амал береди.
Аскерхан Межитов,
«Защитники Отечества» фондынынъ социальли координаторы.