Аталыкты саклавшылар, Элимизди колларында савыт-садак пан коршалап калмай, тылда турып та, оьз аьскершилерине коьтергишлев болып, тынышлы келеектегиге сенимди саклап келуьвшилер де боладылар.
Элимизге кыйын заманларда Кумлы авылдынъ Д.М.Шихмурзаев атындагы орта мектебининъ ис коллективи шетте карап калмай, аьскершилерди коьтергишлевде, ортак енъуьвди ювыклатувда оьз уьлисин косып келеди. Савлай ис коллективи мен олар аьскершилерди явдынъ куьллесиннен коршалав уьшин шилтерлерин, окоп майшыракларын аьзирлейдилер, гуманитарлык югин йыйнап, туьрли акцияларда акша ягыннан ярдамын да этедилер. Янъыларда мектебте тагы да бир маьнели оьзгерис болып озды. Согыс спецоперация катнасувшысы, мектеб выпускниги, ердесимиз Арслан Сейпуллаевич Етмишевтинъ эстелигине «Баьтирдинъ Партасы» ашылды. Шарады мектеб етекшисининъ тербиялав иси бойынша орынбасары Феруза Абдунасова юритти. Аталыктынъ Баьтирлерининъ куьнине багысланган шара «Биз йигитлеримиз бен оьктемсимеге керекпиз» деген шакырув астында озды. «Баьтир Партасы» – ол 2018-нши йылда «Единая Россия» партиясынынъ баславы ман яшавга шыгарылган савлайроссиялык проект. Окувшыларды коркынышсызлык, йигерлик коьрсетип, йигитлик эткен ердеслерининъ тарихи мен таныстырув – сол проекттинъ бас мырадларынынъ бириси болады.
Маьнели проектке Ногай районынынъ Кумлы авыл орта мектеби де косылды. Эстеликли оьзгерис Россия Федерациясынынъ Гимныннан басланды. Партадынъ ашылувында мектебтинъ етекшисининъ аьрекетин кесек заманга юритуьвши, аьскершидинъ бирге окыган йолдасы Сафият Мамбетовна Аджигельдиева, СВО еринде ян берген аьскершидинъ анасы Тайрат Адиловна, онынъ ян косагы Марьямгуьл Толегеновна, аьвлетлери – Дженнет, Рустам, Гюзель, аьскершидинъ мектебте окув йылларында тербиялавында маьнели орынды туткан абасы Маржан Адиловна, ювык кардашлары, окытувшылар эм окувшылар ортакшылык эттилер. Биринши болып соьз Сафият Аджигельдиевага берилди.
– Куьн яхшы болсын, сыйлы конаклар, окытувшылар, окувшылар! Буьгуьн биз Кумлы авыл орта мектебининъ выпускниги, ердесимиз, мектеб досымыз, СВО еринде йигитлерше яны курман болган Арслан Сейпуллаевич Етмишевке «Баьтир Партасы» ашылувына багысланган шатлыклы шарага йыйылганмыз. Арсланды билгенлерге, ювык таныганларга, суьйгенлерге, онынъ акында озган заманда айтув бек авыр. Арслан йогары эдаплы, юмарт, аьдил аьдем эди. «Баьтир Партасынынъ» ашылувы да касымызда шынты баьтирлери яшайтаганы акында шайытлайды. Балалар куьн сайын сол партады коьрип,
онда язылган баьтирлердинъ яшав йолы оларга уьлгили коьрим болып келер. Бизге, окытувшыларга, бу зат балаларда оьктемликти, йигерликти, патриотизм сезимлерин тербиялавынынъ алаты болаягына да соьз йок. Биз Арслан Сейпуллаевич акында эстелик келеектеги аркаларымыз уьшин ийги ислерин этпеге эм йигитлик коьрсетпеге коьнъиллендируьв уьлгиси болаягына сенемиз»,– деди ол. Шарадынъ барысында ердесимиз акында онынъ анасы, кардаш-тувганлары, аьвлетлери йылы эскеруьвлери мен боьлистилер.
Олар Арслан Сейпуллаевичтинъ эстелигин оьмирлеткенлери уьшин мектеб етекшилевине, окытувшыларга уьйкен разылыгын билдирдилер. Айырым шынты юрек сезимлерин аьскершидинъ биринши окытувшысы Зарлихан Курганова, класс етекшиси Кошбике Нукаева эм онынъ бирге окыган тенъ йолдаслары айтып кеттилер. Олар Арсланнынъ билимге ымтылыслыгы, ойлаган затын этпей коймайтаган кылыклы, яваплы касиетли аьдем болып оьскени, аьдил эм сенимли
дос болып келгени акында йылы эскеруьвлери мен боьлистилер. Аьскершидинъ суьврети салынган эм онынъ яшав йолы язылган «Баьтир Партасын» ашпага ыхтыяр анасы Тайрат Адиловнага эм Сафият Аджигельдиевага берилди. Шара катнасувшылары «Баьтир Партасына» гуьл байламларын салып, ердесимизди бир такыйка уьндемей турувлары ман эслерине алдылар.
2-нши класстан яс орляталары эм 8-нши класстан юнармеецлер патриотлык темага ятлавлар окып эситтирдилер. Шара «Своих не бросаем» деген йырын 9-ншы класс окувшысы Залина Арслановадынъ йырлавы тамамлады. Солай болып, мектеб музейинде йигиттинъ эстелигине муьйиси де ашылды. Келген конакларга мектеб музейининъ етекшиси Эмма Саитова экскурсия уйгынлап озгарды. Айтып озайык, Арслан Сейпуллаевич Етмишев 1976-ншы йылда Ногай районынынъ Ленинаулында тувып-оьскен. Ол Д.М.Шихмурзаев атындагы мектебин тамамлаган. Эр борышын толтырганнан сонъ, Норильск каласында куллык эткен. Согыс оьзгерислерининъ ветераны Арслан Етмишев коьп йыллар артта Шешен Республикасында конституционлык йорыгын кайтадан токтастырувда ортакшылаган.
Согыс спецоперация ерине оьз ыхтыяры ман кеткен. Мотострелковый взводы бойынша мотострелковый боьлигининъ коьлик айдавшысы старшина эсабында кызмет эткен Арслан Етмишев уьстимиздеги йылдынъ навруз айында ДНР эм ЛНР еринде согыс спецоперация барысында аьскер борышын толтырувда йигитлерше ян берди. Биз оьз ердесимиз бен оьктемсиймиз. Баьтирлер бир де арамыздан кетпейдилер, олардынъ атлары, коьрсеткен йигитлиги дайымга оьлимсиз.
Г.Нурдинова.
Суьвретте: СВО катнасувшысы Арслан Етмишевтинъ эстелигине «Баьтир Партасы» ашылув шарасында.