Ногай районында «Дагестан Республикасынынъ йыл окытувшысы – 2026» республикалык конкурсынынъ муниципаллык кезегининъ енъуьвшилерине шатлыклы аьлде савгалар тапшырылды.
Ногай район билимлендируьв боьлиги билимлендируьв куллыкшыларынынъ профсоюз организациясы ман биргелесте муниципалитет окытувшыларынынъ зейинлигин коьрсеткен базластынъ сырагыларын келтирдилер. Бу кеспи усталыгынынъ байрамы аьр бир окувшыга билим алувды кызыклы эм уьстинликли этпеге шалыскан окытувшылардынъ ян коьнъилининъ маркын эм аьлиги заманнынъ методикаларынынъ оьлшемин коьрсетти. Доьрт куьн узагына окытувшылар ашык дерислерде аьлемет усталыгын коьрсеттилер.
Тогыз финалистлер сырасында уьш энъ де ийги специалист белгиленди. Биринши орынды Кадрия атындагы мектебининъ обществознание сабагынынъ окытувшысы Фатира Эсенгельдиевна Магомедова казанды. Экинши орынга Куьнбатар авыл мектебининъ баслангыш класслар окытувшысы – Румия Айнадиновна Махмудова, уьшинши орынга А.Джанибеков атындагы мектебининъ математика сабагынынъ окытувшысы Альбина Каирбековна Курганова тийисли болдылар. Окытувшыдынъ исининъ маьнелигин белгиленип, конкурс енъуьвшилерине эм савгашыларына акшалай баргылар тапшырылды: енъуьвшиге – 30 мынъ маьнет акша, экинши орынды бийлегенге – 20 мынъ маьнет акша, уьшинши орынга – 12 мынъ маьнет акша.
Савгалы орынларды бийлегенлерден баска уьш номинант белгиленди: Орта-Тоьбе авыл мектебининъ физкультура сабагынынъ окытувшысы Руслан Мавлимбердиевич Кишинеев, Нариман авыл мектебининъ баслангыш класслар окытувшысы Саудат Эдильбиевна Кокоева, Кумлы авыл мектебининъ орыс тил эм адабиатынынъ окытувшысы Альбина Алибиевна Картакаева. Руслан Кишинеев – «Педагогикалык дебют», Саудат Кокоева – «Педагогикалык исининъ устасы», Альбина Картакаева «Исине алаллыгы уьшин» номинацияларынынъ Лауреатлары атларына тийисли болганлар эм аьр баьриси де 6 мынъ маьнет акшалай баргы ман савгаланганлар. Баска конкурс катнасувшылары, айтпага, Кара-Су авыл мектебининъ география сабагынынъ окытувшысы Динахан Бадурдиновна Нурлубаева, Эдиге авыл мектебининъ баслангыш класслар окытувшысы Кушлихан Крымхановна  Темирова, Карагас авыл мектебининъ обществознание сабагынынъ окытувшысы Нурсиет Рахметовна Аджигельдиева уьшер мынъ маьнет акша ман савгаландылар. Бу сырагылар аьлиги заманнынъ ямагатлыгында окытувшыдынъ исининъ йогары маьнелигин белгилейдилер эм район етекшилевининъ кеспи усталарын коьтергишлемеге, билимлендируьв исин ийгилендируьвге шалысувын белгилейди. Биз баьри енъуьвшилерди ак юректен кутлаймыз эм аьр бир катнасувшыга конкурста ортакшылык эткенлери уьшин разылыгымызды билдиремиз. Сондай окытувшылар исининъ аркалы балалар сапатлы билим аладылар эм танълагы куьнге йигерли карайдылар.
Конкурс бир-бирин коьтергишлев, команда бирлигининъ аьлинде озды, конкурс катнасувшылары билимлендируьв учреждениелерининъ етекшилевининъ эм ис йолдасларынынъ тиревин сездилер.
Билимлендируьв боьлигининъ информационлык-технический службасынынъ тувра эфирде конкурстынъ баьри кезеклерининъ трансляциясын усташа уйгынлавы, шарады уьйкен аудиторияга коьрмеге амал берди. Акшалай баргылар да билимлендируьв боьлигининъ эм билимлендируьв куллыкшыларынынъ ерли профсоюз организациясынынъ амалларыннан туьзилгенин белгилеп озайык.
Суьвретте: савгага тийисли болган окытувшылар