Талаплы балаларды коьргенде, суьйинмей болмайсынъ. Олар бизге келеектегиде элимизди, тилимизди, маданиятымызды сенимли колларга калдырармыз деген ойды тувдырадылар эм берклендиредилер. Карагас авылынынъ мектебининъ 9-ншы классынынъ окувшысы Азиза Аджигельдиева – талаплы кызалак, ол коьплеген конкурсларда катнасып, баргылы орынларды алады. Мени боьтен де онынъ ана тилине суьйими, тилимизди ийги этип билмеге ымтылысы сукландырады.
– Азиза тек бесевлерге окыйды, мен етекшилейтаган «Тулпар» кружогына 5-нши класстан алып юреди. Айлак яваплы, билимли, айткан борышларды тез этеди, яттан ятлавлар окув конкурсларында катнасады. Ногай тилимизди бек ийги этип биледи. Янъыларда Азиза Савлайроссиялык ана тили конкурсында 3-нши орынды
алды. Ногай районында биринши болып, «Орленок Дагестан» газетасынынъ яс корреспонденти болды. Мен окувшымыз бан оьктемсиймен. Ога алдыда аьли
де коьп уьстинликлер йорайман, – деп хабарлайды Азиза акында Карагас авылынынъ ана тил окытувшысы, шаир Салимет Майлыбаева.
Азиза Аджигельдиевадынъ баьри Сый грамоталарын, Дипломларын бир макаладынъ ишинде коьрсетпеге кыйынлы. Районда, республикада эм элимиз бойынша оьткерилетаган конкурсларда, олимпиадаларда, викториналарда белсен катнаскан окувшыдынъ оьнери белгиленмей калмайды. Азиза «Йыл окувшысы – 2025» республикалык конкурсынынъ мектеб кезегинде енъуьвши болган. Ногай районынынъ администрациясында «Яслык» яслар орталыгы ман аьзирленген Ана куьнине
багысланган конкурсында Азиза экинши орынга тийисли болган.
«Согыс акында окыймыз» конкурсында, белгили шаирлерлеримизге багысланган шараларда окувшы ортакшылык этеди, оьз оьнерин коьрсетеди.
– Мен бек суьемен ана тилимди. Кайдай ол бай эм ярасык. Салимет Ахмат кызына, суьйикли окытувшыма мен савбол айтаман, ол бизди тувган тилимизди ийги этип билмеге керек деп уьйретеди. Бизим тилимизде кайдай киели, айырым соьзлер бар: Аталык. Ана. Яшав. Тынышлык. Куьн. Оьтпек. Солардынъ баасын билсек,
биз баьри кыйынлыкларды да оьтермиз. Тынышлык болса экен элимизде. Сол заманда баьри зат та болар эди, – деп айтады талаплы кызалак. Акыллы соьзлер.
Аьлиги заманнан алып сондай ойлары болган саьбий яшавында да анъ байлыгын баалап, «яман» ман «яхшыды» айырып болар. Сол ниети аьр дайым туьз
болсын, йоллары ашык болсын деп йорайман Азизага. Яратувшылык йолында да коьплеген кызыклы йолыгыслар сагынаман. Калеминъ оьткир болсын, Азиза.
Г.Бекмуратова,
Россия Журналистлер союзынынъ агзасы.
Суьвретте: А.Аджигельдиева.
