Россияда 2026-ншы йыл Халклар бирлигининъ йылы деп белгиленген. Ол –бизди уллы эм биргелес этетаган оьз тамырларымызга, тарихимизге, баалыкларымызга кайтатаган заман.
Янъыларда район орталык китапханасында Россия халкларынынъ бирлигининъ йылы ашылувына багысланган юреклерди йылыткан бек ийги шара район администрациясынынъ коьтергишлеви мен озды.
Мунда эртеректен аьзирленген «Россия – бизим ортак уьйимиз» деп аталган китап выставкасы, фотосуьврет эм туьрли халкларынынъ уьйшиликте
кулланатаган савыт-садак, миллет кийимлер эм миллет зияпетлер выставкалары шара басланганша дейим китапханады байрам эм йылувлык аьлине бийлетти. Шара «Карлыгаш» балалар фольклор-этнографиялык  ансамблининъ катнасувшыларынынъ ортага шыгып, «Халклар тыпаклыгы» деген ярасык
биюви мен ашылды.
Шарады миллет кийимин кийип, библиограф Гульмира Улубиева юритти.
Биринши болып йыйылганларды Ногай район администрациясынынъ аькимбасынынъ орынбасары Мурат Шадиев кутлады. Ол Россия уллы эм уьйкен эл экенин белгиледи. Онынъ соьзлери мен, бизге сондай аьлемет тарихли элде тувмага эм яшамага буйырган.
Сонъ йыйылганлар алдында ДР ямагат палатасынынъ агзасы, район Хатын-кызлар советининъ председатели Асият Манкаева соьйледи.
Ол яс несилге халклар тыпаклыгын баалап билмеге, уьйкен несилди сыйламага эм оьрметлемеге шакырув этти. А.Манкаева патриотлык сезимлерин бу куьнлерде согыс спецоперация катнасувшылары ашык коьрсететаганын, оларды бир мырат – Россиядынъ бузылмаслыгын саклав биргелестиретаганын белгиледи.
Мурат Шадиев эм Асият Манкаева район китапханалар тармагынынъ етекшиси Сабират Абубекеровага сосындай ийги шаралар уйгынланатаганы эм емисли иси уьшин уьйкен разылыгын билдирдилер.
Шара бойынша китапханада «Лица России» фотосуьврет выставкасы да ашылды, мунда суьвретши-фотографлар ДР ат казанган маданият куллыкшысы Владимир Уразакаев эм РФ Журналистлер союзынынъ агзасы Елена Жуковадынъ фотосуьвретлери коьрсетилинген. Онынъ акында хабарламага Елена Жуковага соьз берилди. Кыскаяклы, олар бу фотосуьвретлерде Уллы Аталык согысы йыллардан сонъгы шактан алып бу куьнлерге дейим заманларды коьрсетпеге шалысканларын билдирди.
СССР туьзилген куьнди белгилев мен байланыслы йылы эскеруьвлери мен Орта-Тоьбе авыл мектебининъ етекшиси Сапият Бекмурзаевна Межитова боьлисти. Киши тувган ери Терекли-Мектеб авылы янга якын экенин бу куьнги шарадынъ конагы – РФ ат казанган окытувшы Раиса Федосеевнадынъ кызы Ольга Трунова айтты. О.Трунова оьзининъ аьптеси Анна Трунова ман бирге байрамга келген эди.
Шара барысында йыйылганлар «Бу бизим Россия» деген викторинада катнасып, элининъ маданият байлыгы бойынша оьз билимлерин тергедилер. Солай ок Россиядынъ орманлары, тенъизлери, тавлары, сонынъ сырасында Ногай районынынъ боьригоьзлер тоьгилип оьскен кырлары акында юреклерди кувандырган видеоролик коьрсетилди. Оьз йырлары ман шарады йырлавшы Медина Елманбетова ярасыклады. «Карлыгаш» ансамблининъ артистлери туьрли халкларынынъ маданияты, дини, асханасы акында айттылар.
Байрамнынъ сонъында баьри конаклар элимиздинъ туьрли миллерининъ зияпетлери туьзилген сыпырага шакырылдылар.
Н.Кожаева.
Суьвретте: шарадан коьринис.