«Ногайский район» МР администрациясы сизди буьтин дуныя мусылманлары ман белгиленетаган Ислам динининъ энъ оьрметли деген – Ораза-байрам куьнлери мен кутлайды.
Киели Рамадан айынынъ терен анъ-эдап маьнелиги бар. Ол янъыртув суьйинишининъ, туьрли як оьрленуьвдинъ, ак ниетли ийги ислер этуьвге аьзирликтинъ, керексинетаганларга ярдам этуьвдинъ белгиси болады. Ол ян тазалыкка, ювыкларынынъ эм кардаш-тувганларынынъ акында каьр шегуьвге, баьри керексингенлерге языксынып, ярдамласпага шакырады. Районымыздынъ ямагат, маданият яшавында, саваплык, ярыкландырув, патриотлык баславларды яшавга шыгарувда, гражданлык тынышлыкты эм макулласувды яклавда, аьдемлер ара дослыкты эм бир-бирисин анълавды беркитуьвде белсенли аьрекети уьшин дин аьрекетшилерине уьйкен разылыгымызды билдиремиз.
Сыйлы дин кардашлар! Ак юректен сизге ян парахатлыгын, аьел наьсибин, алал берекетти, ден савлыкты эм иманлыкты йораймыз.

«Ногайский район» МР администрациясынынъ аькимбасы Д.Эсиргепов.
«Ногайский район» МР Депутатлар Йыйынынынъ председатели А.Менласанов.