«Шоьл тавысы» республикалык газетасынынъ редакциясында терен маьнеси болган кезекли йолыгыс болып оьтти.

Бу йолыгыста согыс спецоперациясынынъ катнасувшысы, бир неше патшалык коькирек белгилерининъ иеси Рустам Магомедов ян косагы ман, Ногай районымызда белсенли аьрекет бардырувшы «Неравнодушные сердца» волонтер куьбининъ агзалары: Крымхан эм Айбике Ялманбетовлар, Зарема Толубаева, Хаирниса Нурлубаева, Нурбике Асанова, Сапиет Даутова эм янъыларда согыс спецоперациясы озып турган ерге гуманитарлык юк еткерип келген, Ногай районынынъ имамлар Советининъ председатели Мухтар Мусаев ортакшылык эттилер.
Йолыгыс бек йылы аьлде оьтти, олай дегеним, аьр кайсы катнасувшы да оьз ойы ман, юрегинде терен сезимлери мен, аьрекет бойынша йолыгатаган кыйынлыклары ман бир ясыртынсыз боьлисти.

Келген конаклар алдында хош келди соьзи мен газетамыздынъ бас редакторы Эльмира Кожаева шыгып соьйледи. Аьр бир келген конакка оьзининъ ийги йоравларын каратты, сондай алал исти бардырувга биргелескен куьпке тек уьстинликлерди йорап кетти. Айырым уьндев соьзин аьскерши конакка каратты:
– Рустам, сен бу куьнлерде, Элимизге тыныш тувыл шакта, эр кисиге тийисли касиет – йигерлигинъди коьрсетип, Аталыгымызды коршалавда юрген аьдемсинъ, сага ден савлык, алдыда тек ийгиликлерди йораймыз…, – деди ол, эм, оьзининъ соравын ога каратып, йыйылганларга дав майдандагы аьллер акында хабарламага тилек салды. Рустам коьп соьзли эр болып коьринмеди, мен оны алдын таныган инсан тувылман, сонынъ уьшин онынъ касиети акында хабарлап болмайман, ама Рустам Оразбай увылы ман бизим газета окувшыларымыз ис йолдасым Магомет-Али Хановтынъ язганыннан биледилер (газета окыйтаганлар), эсинъизге салув уьшин соннан уьзиклеп беремиз:
«… Ол йигерли аьскершилер сырасында бизим ердеслеримиз, Аталыкка алал кеделер де бар. Олардынъ ишинде аьли экинши йылдан артык заман Ногай районынынъ Нариман авыл яшавшысы Рустам Магомедов та СВО еринде катнасады…. Былтыр 19-ншы апрельде РФ Коршаланув министерствосы ман келисуьв туьзип, СВО ерине оьз ыхтыяры ман кеткен… Аьлиги заманларда Рустам Магомедов – 5-нши штурм бригадасынынъ танк батальонында «Т-72 Б3М» модернизированный танктынъ тамада механик-водители. «Бу танк мен уьшин энъ де ийги согыс машинасы болады», – дейди Рустам ога тапшырылган техника уьшин оьктемли кепте. «Куьн сайын да танклар экипажлары алдына кайсы ава аьллеринде де согыс тапшырмалары салынады. Соларды биз куьн узагы доьрт саьат ишинде толтырмага борышлымыз», – деп яваплайды куьн сайын олар неше саьат согыс майданында боладылар деген соравыма Рустам Магомедов…
Согысларда коьрсеткен эрлиги эм кайратлыгы уьшин ол 2-нши дережели «Йигитлик уьшин», «Согыс белсенлиги уьшин», «Красногоровкады алганы уьшин», «Кураховоды алганы уьшин» медальлер мен савгаланган. Янъыларда 5-нши штурм бригадасынынъ командованиеси оны кезекли оькимет савгасы, Эрлик орденине тийисли эткен…». (Онынъ акында толы хабарды 2025-нши йылдынъ 10-ншы июльде шыккан номеринде окымага боласыз).
Сол макала баспаланганнан бери де коьп заманлар оьттилер, не шаклы аьскершилерди йойдык, не шаклы ерлер де явдан босатылды. Олардынъ атлары халк эсинде, тарихте оьмирлерге сакланаяк.
Йолыгыс барысында Рустам коьп соьйлемеди, коьнъили тоьмен экенин сезбей болмадым, анълайман, коьп йолдасларынынъ яшавлары курманлык болган, оьзи дайым согыста алдыда, явды коьз бен коьрип, согыскан эр киси. Ол, биринши караска, эр киси, мен болсам ога карап, оьктемсимей болмадым, Баьтир атка шынтылай да тийисли аьдем, сый эм оьрмет сондай ясларга…
Оны ман йолыгыс, ога тувган яклардан еткерилген посылка акында кызыклы хабарлады ясуьйкен, ама оьзи де бир неше кере СВО ерине, гуманитарлык юк элтеп, барган Крымхан Ялманбетов.
Аьр кайсы согыс та биргелесуьвди талаплайды. Уллы Аталык согысы йылларында айтылган «Баьри зат та фронт уьшин, Баьри зат та Енъуьв уьшин» шакырув-лозунгы бу куьнлерде де куьшин йоймаган, эм заманга коьре келисли де болады.
Аьлиги заманларда да тылда ис юреди эм Уллы Аталык согысы заманлардан кем де тувыл. Увыллары, ювыклары, эрлери согыс спецоперациясында катнасатаганлар эм намыслы аьдемлер фронтка ярдамын этедилер.
Ногай районымызда уйгынланган эм аьрекет бардыратаган «Неравнодушные сердца» волонтер куьби бир йыл ишинде (2025-нши йылдынъ басында туьзилген) аз куллыклар этпеген. Олардынъ коллары ман 200-ден артык шилтерлер согылып, согыска йиберилген. Соны ман мынълаган аьдем яшавы куткарылганга шек йок.
Сол шилтерлерди аьзирлевге алат, карыж, боьтен де куьш те аз кетпейди. Келген конакларымыздынъ билдируьвине коьре, сога 1 миллионнан артык акша шыктажланган.
Йолыгыста конаклар кайдай кыйынлыклар ман да расатаганлары ман, юреклериндеги сезимлери мен, арада болатаган оьпкелери мен де боьлистилер. Власть органларына каратпага суьетаган соравларын айтып кеттилер. Оьзек те, маьселелер бар. Ис юреди, эгер буьтин болса, уйгынлавга да керекли затлар болады. «Эл ваьлий» деп босына айтылмаган, коьп зат халктынъ аркасы ман этиледи. Бу аьрекет те солай, ямагат пан басланган эм бардырылады. Олардынъ тилеги де, тиллери де бир – Енъуьвди ювыклатув. Аьли уьшин волонтерлар куьптинъ агзаларына кереклиси – аьрекет бардырув уьшин мекан яде бир боьлме.
– Гуманитарлык юкти йыйнамага маданият уьйининъ фойесинде бизге ыхтыяр бериледи, ама кыйынлы болады, эртеннен кешке дейим мунда турув. Боьтен де, сувык шакларда, тыныш тувыл эди..,– дейди Зарема Толубаева.
Кайдай кыйын болса да, олар баслаган исин тасламага ниет этпейдилер!
Оьз ойлары ман бу куьн боьлисти Ногай район имамлар Советининъ председатели Мухтар Мусаев. Оны ман бу йол йолдас болып Кизляр районынынъ Макараулыннан имам Мавлутали Муратов, Новодмитриевка авыл имамы Махмуд Болеков, баьримизге де занъыраган тавысы ман, мавлидлерди усташа йырлайтаган Эдиге Беккишиев бардылар.
– Йоллары осал болмады, ама кыйынлыкларсыз да тувыл. Яшав оьмирге кавыфлы ерлер де болдылар. Ак юрегимнен, бир авыз соьзсиз сонда бармага оьзининъ коьлигин бизге сенген, амал берген Адиль Махмудовка разылыгымды билдиремен. Бизди коьрген йигитлеримиз де суьйиндилер, сол якларда биз де оларга ийги йоравларымызды айтып, дуаларымызды окыдык, намазымызды кылып, тынышлыкты Элимизге тиледик, – дейди Мухтар Мусаев.
Йолыгысымыз таьтли зияпетлер салынган тоьгерек сыпыра касында оьтти. Авыл ериннен келген волонтер куьбининъ кыскаяклылары да ислери акында билдируьвлер мен боьлистилер. Аьр кайсымыздынъ да буьгуьнги тилегимиз – Тынышлы яшав келсин. Бу куьнлерде дав майданда юрген йигитлеримиз де сав-эсен уьйлерине келип, сондай таьтли асларды татсынлар.
Аьли болса, баьримиз де куьшимизди оларга ярдам этуьвге салайык: халк та, власть органларынынъ аькимлери де…
Галима Сагиндикова.