Коькек айынынъ 24-26-ншы куьнлеринде Ногай районынынъ Куьнбатар авылында II йылсайынлык бокс бойынша турнир озгарылды. Бу ярыс Россия Баьтири (оьлгеннен сонъ), белгили «Росич» отрядынынъ мергини Рафик Валит увылы Кадырбулатовтынъ сыйына «Ногай общинасы» ямагат организациясы ман (Москва), ДР бокс бойынша Федерациясы ман, Яслар орталыгы «Яслык» пан, Ногай районынынъ бир неше авыл поселениелери мен уйгынланган.
Спорт ярысында 11 командадынъ сырасында 270-тен артык спортсменлер катнастылар – Махачкала, Хасавюрт, Кизляр, Буденновск калаларыннан, Канглы авылыннан, Ингушетия Республикасыннан, Ногай районынынъ Кумлы, Орта-Тоьбе, Карасу, Терекли-Мектеб авылларыннан. Шара ашылувында Ногай районынынъ аькимбасынынъ орынбасары Мурат Шадиев, ТереклиМектеб авыл аькимбасы Марат Кулунчаков, Карасу авыл аькимбасы Амирбек Арунов,
Куьнбатар авыл аькимбасы Замид Яриков, солай ок бокс бойынша ветераны Нурадин Шангереев ортакшылык эттилер. Астрахань областиннен келген делегация – Россия Баьтири Р.Кадырбулатовтынъ ердеслери дебар эди. Делегацияды Астрахань областининъ Приволжский районынынъ аькимбасынынъ орынбасары Марина Коломина етекшилеген. Турнир уйгынлавшысы Арслан Акбердиев катнасувшыларга эм конакларга 7-нши специальли «Росич» отрядынынъ командири, полковник Александр Поповтынъ атыннан хошлав адресин окыды.
Онынъ атыннан турнирдинъ бас тоьрешиси Рашид Янгазиевке эм бокс бойынша тренери Динислам Исмаиловка Разылык хатлар тапшырды. Турнир катнасувшылары эм конаклары Баьтирлер Аллеясында Рафик Кадырбулатовтынъ эстелигине гуьл байламлар салдылар. Ярыстынъ енъуьвшилери, призерлары грамоталар ман, медальлер мен, кубоклар ман савгаландылар. Биринши орынды Дагестан Республикасынынъ Хасавюрт каласынынъ командасы
алды. 2-нши орынга Бабаюрт авылынынъ командасы, 3-нши орынга – Ногай районынынъ Кумлы авылынынъ спортсменлери тийисли болдылар.
Россия Баьтири Рафик Валит увылы Кадырбулатов Астрахань областининъ Приволжский районынынъ Пойменный поселогында 1976-ншы йылдынъ тамбыз айынынъ 13-нши куьнинде тувган. 1994-нши йылдынъ караша айында РФ Савытлы куьшлерининъ сырасына эр борышын толтырмага шакыртылган, МВД иш аьскерлерининъ «Росич» специальли 7-нши отрядында мергин болып куллык эткен. 1995-нши йылдынъ коькек айынынъ 18-нши куьнинде отрядтынъ аьскершилери курсалавга туьседилер. Рафик Кадырбулатов сол согысувда 12 боевиклерди оьлтирген. Каты яраланган болса да, согысувды токтатпаган. Есирге туьспес уьшин граната ман оьзин де, уьш боевиклерди де аткан. Ога Россия Президентининъ 1065 номерли Указы ман 1996-ншы йылдынъ шилле айынынъ 20-ншы куьнинде Россия Баьтири деген ат берилген (оьлгеннен сонъ). Россия иш ислер министрининъ буйырыгы ман 1997-нши йылдынъ сары тамбыз айынынъ 22-нши куьнинде баьтир дайымларга «Росич» отрядынынъ сырасына киргизилген.
Россия Баьтирининъ атын Астрахань областиндеги Пойменный авылынынъ мектеби юритеди, мектебтинъ азбарында Р.Кадырбулатовка эстелик
салынган. Дагестан Республикасынынъ Ногай районында Баьтирлер Аллеясында онынъ эстелиги бар. Терекли-Мектеб, Калининаул, Ленинаул авылларында орамлар Рафик Кадырбулатовтынъ атын юритедилер.
Эльмира Кожаева.