Ногай район орталыгы Терекли-Мектеб авылында Чернобыль атом электростанциясында болган баьле-казадынъ 40 йыллыгына багысланган эстеликли митинг болып оьтти. Элимиздинъ тарихиндеги бу кайгылы куьн акында шарады юритуьвши Артур Межитов кыскаша айтты.
Чернобыль АЭС-ндагы баьле-казадынъ калдыкларын тайдырув ислеринде катнаскан ердеслеримизге каратылган терен сый эм разылык соьзлери мен Ногай район администрациясынынъ биринши орынбасары Рашид Шангереев шыгып соьйледи. Онынъ айтувы ман, сол куьнлерде тек бизим элимизге тувыл, Европадынъ яртысына уьйкен кавыфлык энген эди.
Соны мынълаган ликвидаторлардынъ аркасы ман токтатпага амал табылган. Хыйлы аьдемлер ян бергенлер. «Чернобыльдинъ баьтирлерининъ йигитлиги
бизим эм бизим балаларымыздынъ эслеринде Тувган Элимизге алаллыктынъ, йигерликтинъ эм патриотизмнинъ ярык уьлгиси кебинде сакланмага тийисли», – деди Рашид Шангереев. Район администрациясы атыннан ол бу баьле-казадынъ ызларын тайдырувдынъ катнасувшыларына разылык билдирди.
Солай ок Ногай район администрациясынынъ аькимбасы атыннан районнынъ баьри чернобыльшилерине де Разылык хатлары тапшырылды. Чернобыльшилерге каратылган йылы соьзлери мен ТереклиМектеб авыл аькимбасы Марад Кулунчаков, район Ямагат палатасынынъ председатели Эльмурза Саитов, район Ветеранлар советининъ председатели Акманбет Сангишиев, район Хатын-кызлар советининъ председатели Асият Манкаева шыгып соьйледилер. Олар баьриси де ЧАЭС катнасувшыларынынъ йигитлигининъ эм эрлигининъ тарих яктан маьнелилигин, аьлиги замандагы аьдемлер, боьтен де яслар, Чернобыль катнасувшыларынынъ баьтирлигин мутпаска эм оларга заман-заманы ман сый этип турмага керегин белгиледилер.
ЧАЭС катнасувшыларынынъ район советининъ председатели Руслан Кунтувганов чернобыльшилердинъ ыхтыярларын коршалавда эм кызыксынувларын яклавда белсенлиги уьшин Эльмурза Саитовка, Акманбет Сангишиевке, «Шоьл тавысы» республикалык газетасынынъ редакция коллективине эм тагы
да баскаларга Сый грамоталарын тапшырды.
Батыр-Мурза авыл яшавшысы, ЧАЭС катнасувшысы Русланбий Дильманбетовтынъ тувган унык кызы, А-Х.Джанибеков орта мектебининъ окувшысы
Аиша Дильманбетова эстеликли куьнге багысланган ятлавды яттан окыды. Митингтинъ ызында сонынъ катнасувшылары Чернобыль АЭС-нда болып озган баьлеказадынъ ызларын тайдырув ислеринде катнасувшылардынъ район паркы ишиндеги эстеликли белгисине шешекей байламларын салдылар.
М-А.Ханов.
Суьвретлерде: ЧАЭС баьлеказасынынъ 40 йыллыгына багысланган митингте.
