Ставрополь крайынынъ Нефтекум районынынъ Коясыл авылынынъ «Оьзимиздикилерди тасламаймыз» куьбининъ волонтерлары «Баьри зат та Енъуьв уьшин» деген шакырув астында аьрекетлейдилер. Согыс спецоперациясы басланган куьннен алып Нефтекумск округында алдышылыкта куллык этип турган йигитлеримизге гуманитарлык ярдамды йыйнав бойынша волонтерлар иси белсен юритиледи. Бу округтынъ яшавшылары бир мырат пан, ниет пен бирлескенлер – енъуьвге оьз уьлисин коспага эм аьскершилеримизди
коьтергишлемеге. Коясыл авылында эки йылдан бери «Оьзимиздикилерди тасламаймыз» деген волонтерлар куьби аьрекетлейди. Волонтерлар заманын да, куьшин де аямай, аьскершилерге коьмек этедилер – гуманитарлык юклер йыйнайдылар, шилтерлер согадылар. Валентина Гавриловна Пальчиковадынъ уныгы СВО еринде куллык этеди, соьйтип,
тетеси онынъ уьшин кыйланатаган эди басында, тамаклары ток па экен кеделердинъ, алдышылыкка асты еткеруьв де маьселе болар деп. Волонтерлар барысы соннан басланды. Валентина Гавриловна танысларына, ювыкларына занъ согып, биргелесип, ясларга коьмек этуьв керек деп айтты. Баьриси де бу шакырувга макул болдылар. Мине соьйтип, команда туьзилди. Аьлиги заманда волонтерлар куьбинде йырма, юреклери йигитлеримиз уьшин тынышсызланып туратаган кыскаяклылар йыйналдылар – Сания Мениязова, Татьяна Панарина, Женслу Шихжамалова, Зухра Мусаламагомедова, Валентина Пальчикова, Напизат Карагулова, Сталинат Мурзалиева, Муратхан Елманбетова, Валентина Золотарёва, Зухра Нурласанова, Райхан Мурзаева, Ирина Березуцкая, Галина Курилова, Вера Гаморигова, Асият Нурмухамбетова, Марина Тупко, Саният Беккуватова, Нафизет Аджигабулова, Таисия Захарова, Болдубике Курманалиева. Бас деп азык-туьлик йыйнайтаган эдилер, сонъында согысув ерлерге тек азык тувыл, баска затлар да керек экенин анълап, уьйкен акциялар озгарылатаган болды. Сондай аьруьв ислер этилинетаганы акында савлай авылга хабар яйылды. Маданият уьйинде волонтерларга ерли администрация боьлме шыгарды, сонда шилтерлер согылатаган пункт ашылды. Мунда Коясыл авылынынъ яшавшылары азык-туьлик, керекли затлар аькелетаган болдылар. Эртенънен кешке дейим куллык юреди – хатынлар аьскершилеримиздинъ кавыфсызлыгын саклайтаган шилтерлерди согадылар.
Кыйынлыкларга карамастан, олар оьз аьрекетин бардырадылар, бир-бириси мен сулыбы ман боьлиседилер, неге десе дурыс согылмаган шилтердинъ пайдасы йок. Буьгуьнлерде бу хатынлардынъ куьши мен фронтка 200-ден артык шилтерлер йиберилген. Тез эм сапатлы этип олар шилтерлерди согадылар.
– Спанбон да коьп керек болады. Йыйналган акшага аламыз оны. Коьплеген аьдемлер азык-туьлик аькеледилер, биревлер боьреклер писиредилер, баскалар дарманлар алып йибередилер. Бизге аьскершилеримизди коьтергишлев бек маьнели. Бизим авылдынъ яшавшылары бек ийги аьдемлер, языкшыл. Биз оларга савбол айтамыз ярдам эткенлерине,
– дейди Валентина Гавриловна. Онынъ айтувы ман, аьр бир каьпик пайдалы, элли яде юз маьнет болсын, сол кайдай сардарлы уьлис куьтип турган енъуьвимизге. Солай
ок волонтерлар казгын май шыраклар этедилер.
– Бу иске биз яваплылык пан караймыз. Ярык эм йылув беретаган пайдалы булакты этуьв уьшин коьп зат керек тувыл – темир банка, картон, оьсимлик май, воск пан парафин. Болса да, оны этуьвге де сулып керек, – деп боьлиседилер волонтерлар.
Гуманитарлык ярдам аьскершилеримиздинъ айтувы ман йыйналады эм ерине еткериледи. Сол юклер тек алдышылыкка тувыл, Курская, Донецкая, Белгородская областьлерине госпитальлерге яраланган йигитлеримизге йибериледи. Оларга да коьтергишлев керек.
Волонтерлар кешекуьндиз ислейдилер. Баьрисине де билдируьвлер етсин деп социаллык тармакларда куьплер ашылган. Олар мунда эткен ислери акында эсап бередилер, маслагатлар ман боьлиседилер, аьскершилерден келген разылык соьзлерди йибередилер. Олар баьриси де – касымызда яшайтаган хатын-кызлар, биревлери тийисли тыншаювда, баскалары ислейдилер. Коьплерининъ эрлери, увыллары, уныклары СВО еринде яв ман согысадылар. Сол согысувда биреви де йоклар да бар. Сол маьнели тувыл, волонтерлардынъ кайбирисининъ согыс спецоперациясында йигитлерше согыскан аьр бир яс уьшин янлары авырыйды. Бу ерде ят аьдем йок, бу кайгы баьримизге де ортак. Эм бу куьптинъ хатынларында да бир борыш – колдан келген коьмекти этпеге, ясларымызды коьтергишлемеге. Соьйтип этсе, ясларымызга бираз сама енъил болар.
«Оьзлеримиздикилерди тасламаймыз» деген волонтерлар барысы 2023-нши йылдынъ ызында ислеп баслаган, 2024-нши йылдынъ увыт айында биринши гуманитарлык юк алдышылыкка кеткен. Сол йыллардынъ ишинде СВО ерине аьскершилерге керекли затлар ман 5 тонна юк, 2000 яюв яялыклар, 2500 казгын майшыраклар эм баска затлар йиберилген.
– Гуманитарлык юкти СВО еринде йигитлерше согысатаган ясларымызга йыювда, йиберуьвде эм еткеруьвде бизге коьмек этетаганларга савбол айтамыз. Биз оларды сав-саламат болып уьйге кайтканын тилеймиз, куьтемиз эм кыйынлы аьлдеги яшавларын енъил этуьв уьшин куьшимизди салармыз, – деп айтадылар волонтерлар.
Г.Бекмуратова.
Суьвретте: Коясыл авылынынъ волонтерлары.