Уллы Енъуьв – эркликтинъ, куьшлиликтинъ, совет халкынынъ бирлигининъ белгиси, юректен юрекке, авыздан авызга коьшкен несиллер оьктемлиги болады. Ол дав майданларда оьзлерин аямай яв ман согыскан уьйкен атайлар уьшин оьктемлик. Уллы Енъуьв – тири эстелик, баалы асабалык. Уллы Аталык согысындагы халк йигитлигин биз
оьмирлер эсимизде сакламага борышлымыз.
Уллы Енъуьвдинъ 81-нши йыллыгына багыслап, район орталык балалар китапхана куллыкшылары «Вовек нам даты этой не забыть» эртенълигин уйгынладылар. Сондай аьр бир шара баьтирлердинъ аты мутылмас, яс несил сол йыллардагы оьзгерислер акында акыйкатлыкты билер уьшин аьли де бир абыт болады. Патриотлык шарасы Терекли-Мектеб авылындагы Капельгородский паркында янлары курман болган баьтирлер эстелигининъ касында оьтти. Мунда Кадрия атындагы мектебининъ 6-ншы класс окувшылары Уллы
Аталык согысынынъ ветеранларынынъ суьвретлерин колларына алып, ятлавлар окыдылар, баьтирлер акында айттылар.
Роза Колебаева ман Милана Дильманбетова согыс акында йырлар йырладылар.
Бу куьнги шарады «Карлыгаш» балалар хореографиялык ансамблининъ катнасувшылары биювлери мен, С.Батыров атындагы саниятлар мектебининъ окувшылары Шамиль Кокешов, Заур Мулляминов кобызда ойнап, саниятлар мектебиндеги «Юлдызлар» ансамблининъ катнасувшылары домбырада ойнавы ман боьтен де кызыклы эттилер.
Бу куьн «Читающая армия правнуков Победы» республикалык патриотлык акциясы бойынша оьткен китапхана дериси ортаншы класслар окувшыларын йыйды. Дерис В.Катаевтинъ «Сын полка» повести бойынша озды. Белгиленген китапти туьрли несиллер балалары суьйип окыганлар эм бу куьнлерде де повесть окувшыларды кызыксындырады. Сога шара барысында онынъ уйгынлавшылары шайыт болдылар.
Китапхана куллыкшысы Ф.Эспергенова кыскаша повесть туьзилуьвининъ тарихи, язувшы Валентин Катаевтинъ яшавы эм яратувшылыгы, балалардынъ бактысына согыс оьз себеплигин эткени акында кызыклы хабарлады. Йыйылганларга язувшыдынъ суьвретлери, фильмнен уьзиклер коьрсетилди. Повесть балалардынъ юрегине еткени аян сезилди,
олар Ваня Солнцевтинъ уьстинликлерине суьйиндилер, янъылысларына кыйналдылар. Балалар бирге повестьтинъ баьтирлерининъ эткен ислерине белги де бердилер. Китапхана куллыкшылары китаплер, выставкалар, патриотлык шаралар аркалы балаларга таза аспан уьшин кайдай баа берилгенин анълатпага шалыстылар.
Нурият Кожаева.
Суьвретте: шарадан коьринис.
