Янъыларда Россиядынъ бас каласы яс тергевшилерин эм келеекте ерли самоуправление алдышыларын бирге йыйды. Онда тарихти тергевге эм оны саклавга белсенли
кирисетаган талаплы ясларды коьтергишлеп аянламага эм тувган ерде ерли самоуправлениеди оьрлендирмеге каратылган шаралары кирген «Меним тувган еримде ерли
самоуправлениединъ тарихи» деген X мерекели Савлайроссиялык конкурсынынъ очно кезеги болып оьтти. «Калада, авылда не зат туьрлендирмеге болады?» деген маьнели соравларына явап таппага шалысув ман сол конкурстынъ бас ойы тувган. Буьгуьнлерде 10 йыллар озган сонъ да, конкурс элимиздинъ тувган ерининъ тарихине эм
оьрленуьвине терен кызыксынувды коьрсетип келген баслангыш класс окувшыларыннан алып, студентлер эм яс специалистлерине дейим бирлестирип келеди.
Тоьрешилер мен 43 номинациялар бойынша ислерди тийислише бааланып, 630 енъуьвшилери белгиленди.
Дагестан Республикасынынъ Ногай районыннан делегация Савлайроссиялык конкурсында етимисли катнасты. Районымыздан айтпага, Кумлы, Карагас, Нариман, Куьнбатар,
баска болып, Терекли-Мектеб авыл Джанибеков атындагы орта мектеблери оьз ислерин уьстинликли коьрсеттилер. Шара катнасувшыларынынъ терен билимлери, ислерине яратувшылык янасувы, алдышы болув сапатларын коьрсетуьви тоьрешилер мен йогары бааланды. Ярыстынъ тамамы бойынша Кумлы авыл Д.Шихмурзаев атындагы орта мектебининъ яс тергевшилери эки баргылы орынды бийледилер. 11-нши класс окувшысы Алина Нурлубаева «Тергевлер: XVIII оьмирдинъ ортасыннан алып аьлиги заманга дейим меним тувган еримнинъ ерли самоуправлениесининъ тарихи», сол ок мектебтинъ 10-ншы класс окувшысы Аиша Нурлубаева «Ерли самоуправление алдышылары» деген
номинациялары бойынша ислери (илми етекшилери Э.Мурзаева) уьшинши орынга тийисли этилди. Куьнбатар авыл М.К.Курманалиев атындагы орта мектебининъ
окувшылары да ийги тамамларын коьрсеттилер. Айтпага, 10-ншы класс окувшысы Муслим Мусаев «Видеоролиги: Ерли самоуправление алдышылары» номинацияда (илми етекшиси М.Саянова) уьшинши орынды бийледи.
Солай болып, сол ок мектебтен 6-ншы класс окувшысы Абдулкерим Аджаковтынъ «Тергевлер: Тувган еримнинъ ерли самоуправление алдышылары» деген номинация бойынша аьзирлеген тергев иси де (илми етекшиси Э.Еллыева) йогары бааланды. Джанибеков атындагы орта мектебининъ окувшылары «Видеоролиги: Эгер мен муниципаллык образование аькимбасы болган болсам» деген номинация бойынша Эмир Каракаев 2-нши, Салман эм Султан Аджибаевлер (илми етекшилери Г.Хосбулатова) 3-ши орын
иелери болдылар. Айтпага, баргы иелериннен баска, Ногай районыннан ислери йогары оьлшемде бааланган катнасувшыларын да белгилеп озайык. Нариман авыл А.Б.Асанов атындагы орта мектебининъ 9 «а» классынынъ окувшысы Абдул-Азим Сангишиев «Тергевлер: XVIII оьмирдинъ ортасыннан алып аьлиги заманга дейим меним тувган еримнинъ ерли самоуправлениесининъ тарихи» номинациясында «Нариман аьвелги эм келеектеги арасында» деген иси мен (илми етекшиси У.Эсенгельдиева) катнасты. Карагас авыл
К.Ш.Кидирниязов атындагы орта мектебининъ 8-нши «б» класс окувшысы Камилла Джумандыкова «Видеоролиги: Муниципаллык образованиемиздинъ белгилери»
номинацияда видеоролиги мен, сол ок мектебтинъ 7-нши класс окувшылары Назим эм Адлан Аблезовлар «Тергевлер: Ерли самоуправление службасында аьлиги заманнынъ IT-технологиялары» деген номинация бойынша оьз тергев ислери мен (илми етекшилери А.Биарсланова) катнастылар.
Баьри катнасувшылар да дипломлар, сертификатлар, эстеликли статуэткалар ман белгилендилер.
Сол енъуьвлер – окувшылар эм олардынъ илми етекшилерининъ тиресуьвли ислерининъ тамамын эм Ногай район билимлендируьв боьлигининъ йогары оьлшемде аьрекетлевин ярык шайытлап коьрсетти. Конкурс оьзининъ кенълиги эм йогары оьлшемде уйгынланувы ман катнасувшылардынъ эсинде калды.
Ногай районыннан барган яс тергевшилерине билимлендируьв программасы бойынша Россиядынъ халклар дослыгынынъ университетинде (РУДН) эм Москвадынъ энергетикалык институтында (МЭИ) экскурсияда болмага да бакты буйырды. Дагестан Республикасыннан савлайы 88 яс тергевшилери ортакшылык эттилер. Яс тергевшилерге келеекте де енъуьвлерди, янъы билимлерди, бийикликлерге етисуьвди йораймыз!
Эмма Саитова, Кумлы авыл орта мектебининъ орыс тил эм адабиятыннан окытувшысы.
Суьвретте: шара катнасувшылары.