Уьстимиздеги йылдынъ курал айынынъ ишинде Дагестаннынъ Кизляр районы бойынша аьскер комиссариатында РФ Савытлы Куьшлери сырасында службасын оьтпеге ясларды йиберуьвге багысланган шара уйгынланып озды. Яслардынъ яшавында маьнели кезекти белгилеген шарада Кизляр районынынъ администрация аькимбасынынъ биринши орынбасары Т. Гаирбеков, район аькимбасынынъ коррупция ман куьрес юритуьв бойынша коьмекшиси А.Даитбегов, Кизляр районнынъ военкомы Р. Курамагомедов, Россия
бойынша Кизляр районынынъ МВД боьлигининъ ямагат йорыгын саклав бойынша полиция етекшисининъ ис борышын толтыратаган Э. Магомедов, ямагат организациялар ваькиллери, баска болып, эр борышын толтырмага йолланганлардынъ кардаш-тувганлары эм дослары ортакшылык эттилер.
Т.Гаирбеков район аькимбасы А.Микиров атыннан, ясларга аьскер сырасында оьзлерин тийисли коьрсетип, службады етимисли оьткенин йорады. Солай болып, ол аьскер службасы аьр бир яс аьдемнинъ яшавында маьнели кезек эм эли алдында сыйлы борыш болатаганын да белгилеп озды. Шарадан сонъ, аьскер сырасына йолланган яслар (суьвретте) йыйылыс пунктына йиберилдилер, оннан олар туьрли аьскер боьликлеринде ерлесееклер.
Белгилеп озайык, срочный аьскерлик службасынынъ болжалы туьрленмеген – бир йыл. Аьскер сырасына йолланганлар буьгуьнлерде оьтетаган кампания бойынша согыс спецоперация юретаган ерге борышын толтырмага йиберилмееклер.