12-нши июнь – Россия куьни, бизим миллет бирлигимизди эм элимиздинъ аьлигиси эм келеектегиси уьшин ортак яваплылыгымызды белгилейтаган куьн. Бу байрам куьни закон эм дурыслык негизинде баьри аьдемлердинъ эркинлигин, гражданлык тынышлыкты эм макулласувлыкты билдиреди.

Ол Тувган Элин суьетаган баьрисин де бирлестиретаган куьн болады.
Россия куьни – ол патшалыгымыздынъ тувган куьни тувыл, неге десе Россиядынъ тамырлары мынъйылларга терен кетеди. Муннан 36 йыл артта, 1990-ншы йылдынъ 12-нши июнинде, Россиядынъ тарихинде янъы заман кесеги басланган, сонынъ уьшин СССР элимиз бузылып турганда, бу куьн янъы Россиядынъ туьзилип басланувын белгилейтаган куьн деп саналады. Биз, неге десе буьгуьнлерде элимиздинъ уллылыгын кайтадан аягына тургызамыз, келеектегиге сенимлик пен эм бурынгы заманга разылык пан караймыз. Аьлиги шакта, согыс спецоперациясы юритилип турган аьсерде, бу байрам биз уьшин айырым маьнели болады.
Бириншилей, Россия куьни – ол буьгуьнлерде колларына савыт алып патшалыгымыздынъ суверенитетин, онынъ келеектегисин коршалайтаган аьскершилеримизге терен разылыгымызды билдиретаган куьн. Экиншилей, элбетте, сол куьн бизге элимиздинъ, байрактынъ, гимнининъ, гербтинъ, бизим Президентимиздинъ тоьгерегинде бирлеспеге керегимизди эске салады. Биз буьгуьн савлай дуныяга халкымыз баьри кыйынлыклардан да оьтер, бизим элге кырдан этилинип турган кавыфлыкты енъер, россиянлылар куьшли, биз – коьпмиллетли патшалык эм бизди бирев де енъип болмаягын коьрсетпеге борышлымыз. Ол зат бу йылды Президентимиз – Россия халкларынынъ Бирлик йылы
деп белгилегени мен байланыста боьтен де йогары маьнеди тутады, неге десе Россия – уьйкен, уллы, коьпмиллетли эм коьпконфессиялы эл. Сол себептен Россия куьни бизге бирлеспеге эм тувган Аталыгымыз бан оьктемли болмага амал беретаган байрамлардынъ бириси.
Ызгы йылларда бизде бек маьнели ис болды – биз элимиз уьшин оьзимизге алдынгы йойылган оьктемлигимизди кайтардык. Ол зат, СССР патшалыгымыз бузылган сонъ, бизим энъ де маьнели етимисимиз деп саналады.
Биз оьзимиз уьшин биз – россиянлылар деген оьктемлигимизди кайтадан тургыздык эм басларымызды йогары коьтерип алдыга караймыз. Сол сезим айлак
та бек Россия куьнинде артык баалы болады.
Россия куьни – ол бирлигимиздинъ эм патриотлыгымыздынъ белгиси. Сол куьн аьр бир гражданин Аталыгымыздынъ уллы тарихинде оьзининъ де байланыслыгын сезбеге, бизим уьйкен енъуьвлеримизди эм йойымларымызды эсине алмага керек болады.
Келеяткан Россия куьни мен байланыста аьр кимди де кутлаймыз. Бизим уьйкен элимиз сонда яшайтаган аьр аьдемге де оьрленмеге амал берип, оьзи де шешекейленсин! Баьрине де тынышлыкты, берекетти, патшалыгымызга суьйимликти эм тил бирликте илгери оьрленуьвди йораймыз!