Янъыларда Сраждин Батыров атындагы саниятлар мектеби оьзининъ 60 йыллык мерекесин белгиледи. Коьплеген талаплы балаларды шыгарган бу мектеб. Кайдай талаплы окытувшылар ислейдилер саниятлар уясында. Солардынъ бириси – Мархаба Аджибатир кызы Шалиева. Талаплы суьвретшидинъ тербияланувшылары туьрли конкурсларда катнасып, баргылы орынларга тийисли боладылар. Соьйтип, Мархаба Аджибатир кызы «Гризодубовский окувлар» Савлайроссиялык проектин яшавга шыгарув ниет пен «Енъуьвдинъ хатын-кызлар бети» деп аталган ашык дерисин озгарды. Бу шара «Совет хатынларынынъ антифашистлик комитетининъ» туьзилуьвининъ 85 йыллыгына эм Совет Союзынынъ Баьтири, летчица Валентина Гризодубовадынъ эсин оьмирлетуьвине багысланган эм Ногай районынынъ Хатын-кызлар советининъ председатели Асият Манкаева ман биргелесте уйгынланган.
Ашык деристинъ сыйлы конаклары Ногай районында «Россия «Чернобыль» Союзы» боьлигининъ председатели Руслан Кунтувганов, СВО еринде ян берген А.Биякаевтинъ
анасы Кошимхан Аблезова, ДР ат казанган окытувшы Эльмира Толубаева болдылар.
Сондай шаралар балаларда патриотизм сезимин тувдырадылар. Мархаба Шалиева окувшыларга Уллы Аталык согысында совет халкы коьрген кыйынлыгы акында хабарлады.
Бек кызыклы этип Асият Манкаева шыгып соьйледи, В.Гризодубовадынъ акында айтты. Бизим ердесимиз Аминат Оразбаевадынъ акында да хабарладылар, ол Эльмира
Расиль кызы Толубаевадынъ абасы болган. Буьгуьнлерге дейим ол Аминат-абасынынъ немерелери мен байланыс тутады. Окувшы Медина Ахмедова оьзининъ «Кырлув» иси акында хабарлады. Ол Уллы Аталык согысынынъ кишкей баьтири, ногай кызы Крымхан Мижевады ясаган. Кызалак 13 ясында баьтирлерше ян берген. Солай ок балалар алдында конаклар да шыгып соьйледилер. К.Аблезова увылы акында хабарлады.
Мархаба Шалиевадынъ окувшылары оьзлери ясаган суьвретлери акында хабарладылар. Мунда согысувлар, кавгада эр кисилер мен бирге Енъуьвди аькелген хатынкызлар коьрсетилген. Сонъында балалар бирге косылып, киши выставка уйгынладылар.
Г.Бекмуратова.
Суьвретте: шара катнасувшылары.