Янъыларда Ханты-Мансийск каласында Параспартакиада, Сурдспартакиада эсабында енъил атлетика бойынша чемпионаты эм бириншилиги тамамланды. Сол уьш куьнлер бойы тиресуьвли куьресуьвлер, етискен уьстинликлер шынты атлетлерининъ алдында оравлык тувыл экенин ашык коьрсетти.
Уьш авыр куьнлер бойы юзлеген стартлар, онлаган казанылган савгалар – сол баьри затлар да, айтпага, спорт межесиз экенин ыспатлав уьшин онъайлы мырад пан
уйгынланган эдилер. Юградынъ 18 муниципалитетлериннен 240-тан артык спортсменлери «Югра Атлетикс» стадионында ювырув, каргув, ок, диск, тас атув, ядро таслав спорт кеплери бойынша базластылар. Базласувга аьр бир шыгув – оьз-оьзинъди кишкей енъуьв болды. Чемпионаттынъ енъуьвшилерининъ арасында Дагестан Республикасындагы Ногай районынынъ Червленные Буруны авыл яшавшысы Динислам Сабутов та бар эди. Ердесимиз базласувларда етимисли катнасып, ок, диск атувда, ядро таславда биринши орынга тийисли этилди. Сол енъуьви ога Ханты-Мансийск автономлы округынынъ чемпионы болмага эм Россия чемпионатында катнасар уьшин Юградынъ йыйылыс командасына путевка алмага амал берди.
«Шоьл тавысы» газетасынынъ редакциясы ак юректен Динисламды казанган ярык енъуьви мен кутлайды. Ога савлайроссиялык оьлшемде де янъы уьстинликлерди, оьзининъ тувган ери – Дагестанды, савлай элимизди данъклаганын йораймыз!
Динислам, янъы бийикликлерге йолынъ дайым ашык болсын!
Л.Бекмурзаева.
Суьвретте: савгалав мезгили.