Буьгуьнлерде элимиз авыр заманларды оьтеди. Согыс спецоперация савлай элимиз уьшин сынав болып эм бу авыр шакта ямагатымыздынъ, айтпага, бирлик, татымлык, тыпаклык, аралык ярдамласув сапатлары ашык аянланып келедилер. Согыс спецоперацияда катнасатаган йигитлер – тек аьскершилер тувыл. Олар согыс спецоперацияга туьрли себеплерден тура кеткен болса да, оларды Аталыгына уьйкен суьйим, оны коршаламага аьзир болувлары бирлестиреди. Аьр бир аьскершилик дережеси, аьр бир казанган савга артында оьз тарихи, мыратлары, кыйналувы болган аьдем турады. Олардынъ аьр бириси Элимизди, онынъ тынышлыгын, берклигин коршалав – тек аьскершилик борыш болып калмай, а яс несиллер алдында яваплылык экенин анълайдылар.
Сол яслардынъ йигитликлери яс несиллерди Элине кызмет этпеге коьнъиллендиреди. Биз оьз аьвлетлеримизге, уныкларымызга йогарымыздагы тынышлы коьгимиз уьшин кимлерге муьсиревли экенимиз эм олардынъ аьр кайсысын эсимизде тутпага кереги акында хабарламага тийислимиз.

Сондай йигитлердинъ бириси – ердесимиз Джанибек Каирбек увылы Абдуразаков. Онынъ балалыгы эм яслыгы Ногай районынынъ Червленные Буруны авылында оьткен. Ден савлыгы ман байланыста он яс толганда, ога аьели мен Астрахань каласына коьшпеге бакты буйырды. Онда яс индивидуальлик кебинде окып, 9-ншы класска дейим билим алды.
9-ншы классты етимисли тамамлаган сонъ, ол компьютерлик курсларын оьтип, коьлик айдав шайытламасын да колына алды.
Оннан сонъ ол Астрахань каласында коьлик айдавшы, заман оьтип, охрана агентствосында аьрекетледи. Срочный службады Джанибек ден савлыгы бойынша оьтип болмады. Ама бала шагыннан алып ол аьскершидинъ кийимин уьстине киймеге, аьскер
сырасында кызмет кылмага, элин коршаламага уьйкен мырат пан яшады.
Эли алдында авыр куьнлер тувганда, Джанибек Каирбек увылы шетте карап калмады. Ол оьз карар алды, 2024-нши йылдынъ
курал айында ол Аталыгын коршаламага оьз эрки мен кетип, Луганск эм Донецк беттеги тарапта, Бердянск каласын босатувда белсенли ортакшылык этип келди.
Бакты оны коьп кере берк болмага сынады. Джанибек биринши кере аягынынъ табанына 2024-нши йылдынъ яз айында каты яраланады. Луганск беттеги тарапта авыр урысларынынъ бирисинде 12 аьскершилерден Джанибек эм онынъ ийинине яраланган «Ярый» деген позывнойы ман согыс йолдасы аман эсен калган эдилер. Йолда яс мина уьстине басып, аягына
каты яраланады. Рациясыз, байланыс амалсыз калган эки аьскершилер орман, далалар бойы ман, бир-бирисине ярдамласып, сегиз куьнлер бойында оьзиндикилерге дейим аман-эсен еттилер.
Яраланган аьскершиди Ростов, оннан сонъ, Санкт-Петербург калаларына, кесек заманнан, Мурманск областиндеги госпитальлерге де еткердилер. Онда ястынъ аягына доьрт кере авыр операция этилди.
Куьн сайын аьдемнинъ берклигин сынавда, яшав баасы йигитлик пен оьлшенген алдышылыктынъ авыр шакларында янды козгаган тарихлери тувадылар. Джанибек Абдуразаковтынъ тарихи – ол онынъ тек согыс йигитликлери акында тувыл, ана ман увылынынъ арасындагы бузылмас байланысы, солай болып, энъ авыр сынавларды оьтпеге ярдамласатаган ян куватлыгы акында хабар болады.
Авыр операциядан сонъ яс, биринши болып, оьзининъ касында олтырган анасы Кумисханды коьрди. Алыс йолга да карамай,
ол увылынынъ яраланганы акында эситип, тез аьрекетлеп ога етти.
Госпитальде аягына авыр операция этилгени, уьш ай узагында эмленуьви онынъ ян куватлыгын соьндирмеди. Ол неонацистлердинъ йолын бувмага, элин коршалавга, эркин йыйып, тагы да турды. Алдышылыкка аьр бир шыгувы алдында ол атасы, анасы, ян косагы, аьвлетлери, абасы Гульнара ман телефон аркалы соьйлейтаган эди. Ювыкларынынъ айткан соьзлери, ога сеними алдыда салынган борышларын оьтпеге бек ярдамластылар. Ама тезден ога тагы да янъы сынавды оьтпеге
бакты буйырды. 2025-нши йылдынъ тамбыз айында онынъ бес йолдаслары алдышылыкта душпан ман каты урыс барысында ян бердилер.
Ядырадынъ куьшли атылувыннан Джанибекти де ювыктагы шукырга атып таслады. Сол шукырда ол сувсыз, ассыз, байланыс амалсыз, рация алатсыз узак уьш куьнлерин озгарды. Ястынъ ата-анасына сол куьнлерде Джанибек сесселемсиз йок болган, деген сувык хабарын тел согып билдирдилер.
Анасы Кумисхан сол хабарга юреги ынангысы келмеди. Тек увылы тири эм ол оны оьлимнен куткармага кереги экенин аян сезди.
Ол автобуска олтырып, увылын излемеге йолланды. Ога ярдамга волонтерлар да косылдылар.
Уьшинши куьн сеним соьнип баслаган заманда, Джанибекти излеп таптылар. Оны биринши болып, сесиннен анасы таныды. Яралы, кан йоювдан куьши тайган Джанибекти «кызыл зонадан» шыгарган сонъ, Ростов эм баска калаларындагы госпитальге эмленмеге йибердилер. Бу йылдынъ коькек айында СВО еринде аьскершилик борышын толтырувда баьтирлиги эм коркынышсызлыгы уьшин Джанибек Каирбек увылы «За отвагу», Суворов, Жуков медальлерине тийисли этилген.
Буьгуьнлерде онынъ ян косагы Вера эм эки увыллары Аскер, Руслан эри эм суьйикли атасы ман, абасы Гульнара аданасы ман, атаанасы Каирбек эм Кумисхан йигит увылы ман бек оьктемсийдилер.
Олардынъ аьел тарихи авыр шакта да анадынъ юреги, сеними, шынты суьйими аьлеметлик этпеге болатаганына, шынты баьтирлик тек дав майданда тувыл, аьсиретли саклаган, сенген юреклерде де туватаганына шайыт болады.
Бу йылдынъ коькек айында ол яра алувы бойынша аьскерлик аьрекеттен босатылган.
Баска болып, Джанибек Каирбековичтинъ тарихи – ол йигитликтинъ, алаллыктынъ, буьгилмес куьш- куватлыктынъ тарихи де
болады. Сол зат, аьдем авырлыкка да карамай, оьзинде Элин коршаламага куьш табувынынъ уьлгиси болады.
Биз Элимиздинъ сондай коршалавшылары ман оьктемсиймиз, элимиздинъ тынышлы келеектегиси уьшин яшавын, куьшин берип келгенлердинъ аьр кайсысын да дайымга эсимизде тутаякпыз.
Г.Нурдинова.
Суьвретте: Джанибек Абдуразаков анасы ман.