Россия Федерациясынынъ Савлык саклав министерствосы ман элимизде наркотиклерди кулланувдынъ алдын шалув
юмалыгы июнь айынынъ ызгы куьнлеринде озгарылады.
Шаралар наркомания ман куьрес юритуьв Халклар ара куьни мен байланыста оьтедилер. Соьйтип, Ногай район орталык
китапханасында яслардынъ яшавына эм келеектегисине кавыфлык аькелетаган касиетлерден сакланувын кеплендируьв, оларга наркотиклердинъ уллы зарары акында анълатув ниет пен Ногай район орталык китапханасында маьнели эм пайдалы шарасы оьтти. Мунда
Ногай район аькимбасынынъ орынбасары Мурат Шадиевтинъ, ПДН тамада инспекторы полиция майоры Арслан Рахмедовтынъ, коррупцияга карсы турув бойынша Ногай район аькимбасынынъ коьмекшиси Руслан Аджиевтинъ А.Джанибеков эм Кадрия
атындагы мектеблерининъ окувшылары ман йолыгысы озды.
«Наркотиклерсиз яслык» шарасы китапхана куллыкшысы Арина Якубовадынъ темадынъ заманга келисли эм яслардынъ ден савлыгына пайдалы болган яшав кебин сайлавдынъ маьнелигин, наркотиклер терен шукырга аькететаган абыт экенин анълаткан соьзи мен басланды. Йыйылганларга Ногай район прокуратурасы ман аьзирленген яйнап турган яслык заманын
эм мыратларын бузган наркотиклер эм оны берген досларынынъ акында социаллык видеоролиги коьрсетилди.
Арслан Балманбетович бизим районда бу куьнге эсапта 6 ясы етпеген оьспирлер туратаганын белгиледи. Ол Россия Федерациясынынъ Уголовлык кодексининъ 228-нши статьясы бойынша дембиге йолыктырув йорыгы, неше йылга капалатаганы акында айтты. ПДН тамада инспекторынынъ соьзлери мен, белгиленген статья бойынша аьдемнинъ бир заманда
дембиге йолыктырылувы оны блокпостларда полиция куллыкшыларына тергев уьшин негиз болады. Эсапта турган ясларды да полиция куллыкшыларынынъ, неше саьатте болса да, уьйлерине барып, кайдай аьлде экенин тергемеге амаллары бар экенин
йыйылганлар оннан эситтилер.
Орыс классигининъ тийисли увыл оьз анасынынъ кайгырувына рахатлы карап болмайтаганы ман байланыслы соьзлери мен баслады шыгып соьйлевин район аькимбасынынъ орынбасары Мурат Шадиев.
– Наркотиклер кулланган яс уьшин бир киели зат та калмайды. Онынъ уьшин Тувган Эл де, ана-ата да йок, онынъ янын бир зат та, ювык аьдемлердинъ кыйналувы да козгамайды. Дуныяда бир ата-ана да оьзлерининъ баласы наркотиклер мен пайдаланганын суьймейди, олар уьшин сол – уьйкен кайгы, а наркоманды ол кызыксындырмайды, онынъ тек бир мырады бар – оьзине наркотиклер табув. Ондай аьдем урламага да, оьлтирмеге де, дослыкты сатпага да аьзир, олар ман бек коьп кыянатлыклар этилинеди. Сондай аьдемлерден эрек болынъыз, олар сизди кайдай баьлеге де йолыктырмага боладылар,
солардынъ сырасында оьзи мен бирге шукырга аькетуьв.
Савлай элимизде, сонынъ сырасында республикамызда да, йоллардагы кателер, согыс спецоперация барысында Элин коршалап эм баска аьллерде, баьриси бирге наркотиклер кулланувдынъ зыяны аркалы яшавлары уьзилгенлердинъ санына тенъ. Сонынъ
акында билдируьвлерди сиз интернет амаллары бойынша таппага боласыз. Ызгы заманларда кулланылатаган наркотиклер айлак та тез бойсынувга аькеледилер, – деди ол.
Руслан Аджиев Ногай районда наркотикли алатлар оьстируьв уьшин ава-аьллер онъайлы экенин, соннан тура ясларга кара-ниетли маслагатлар бергенлер болмага болатаганын айтып, оларга сак болмага тилек салды.
– Сизге боьригоьз, конопля оьсимликлерин уьйде бавынъызда яде бакшанъызда оьстирши деп тилегенлер, оны бирев
де билмес, сага сонынъ уьшин бир дембиге йолыгув да коьринмес деп айтканлар болмага болады. Наркотиклери болган оьсимликлерди оьстируьв уьшин уголовлык яваплылык каралады. Бу йыл, алдынгы йыллардагындай болып, бизим районда «Мак-2026» деген операция юритиледи.
Авыл хозяйство управлениесининъ куллыкшылары сол оьсимликлер оьсуьвин тергейдилер, оьзек те, олар аьдем шашпай да шыкпага боладылар, –деди ол.
Бу куьн окув ошакларда яслар наркотикли алатлар кулланув бойынша медицина куллыкшылары ман тергелетаганы да айтылды. Эгер олардынъ сол зарарлы затлар ман пайдаланувы аянланса, олардынъ келеектегиси «кара сызык пан
сызылатаганы», йорык окув ошагыннан оны тайдыратаганы, бир куллыкка да оны
бирев де алмаягы да йыйылган оьспирлерге шара бойынша айтылды. Солай болып, калаларда бизим ясларга наркотикли алатларды бир ерге салып калдыр, сонъ оны алып кетерлер, а сен акшалы боларсынъ деген аьдемлерден эрек болмага маслагат эттилер.
«Наркотиклерсиз яслык» йолыгысы оьспирлердинъ юреклеринде ыз калдырганына, наркотиклердинъ уллы зыяны акында ойлатканына эм келеектегиси олардынъ колында экенин анълатканына эм бизим балалар дени сав келеектегиди сайлаягына китапхана куллыкшылары уьйкен сеним этедилер.
Нурият Кожаева.
Суьвретте: йолыгыстан коьринис.