Янъыларда савлай Россия эли бойынша орта медициналык куллыкшысынынъ куьни белгиленди. Аьр бир медициналык куллыкшы, буьгуьнги тыныш болмаган заманда, оьзининъ ис орынында, берген антына коьре ис аьрекетин бардырады эм оьзи кеспилик байрамын да соьйтип йолыкты.
Олар буьгуьн, элимизде коронавируслы мараз яйылып баратаган заманда, оьз яшавларынынъ баасы ман, ден савлыкларын аямай, ис борышларын толтырадылар.

Буьгуьнги тыныш болмаган аьллерде кайтип ис борышынъызды толтырасыз, деген соравыма Ногай районынынъ Орталык больницасынынъ медициналык куллыкшылары Наида Аджимамбетовна Байгараева ман Людмила Викторовна Атаева бир тавыстан:

– Элбетте, аьллер енъил тувыл, авырувлылар саны куьннен-куьнге оьсип турады, олардынъ да савлыклары осал ерлер де болады. Уьстимизге, оьзимизди сол авырувдынъ зарарыннан саклар ниет пен, кийген кийимимиз де бек арытады. Арасында, соны шешип, боьликтен шыгып кеткинъ де келеди, тек авырувлылардынъ кейфсиз аьллерине, каьрип коьзлерине карасанъ, олар меннен коьмек куьтеди ше деген ойлар тартып токтатады, амалымыз йок, биз колларымыздан келген коьмеклеримизди керексингенлерге этпеге керекпиз. Солай болмаганда, биз ис борышымызды да толтырмаганга эсап болаякпыз. Авырыган аьдемлер тек дарманлардан себебин куьтпейдилер, оларга йылы соьзинъ де эмлев болады. Ушынын айтсак, биз сол авырувлылар ман ювыкласып та каламыз. Оьзимиз де сондай ерде де яшаймыз, биреви янынъ, баскасы коьзинъ болады.

Наида Аджимамбетовна Байгараева асылы ман Тарумов районынынъ Ново-Дмитриевка авылыннан. Наидадынъ балалыгы да, яслыгы да оьзининъ тувган авылында оьткен. Оьзининъ айтувы ман, кеспи сайлав да бир кужыр болып калган. Оьзининъ токтаскан кесписи болмаган экен, мектебти уьстинликли кутарып, анасынынъ буйырыгы ман, Кизляр каласындагы медициналык окув ошагына туьседи.

– Кеспи сайлавда сага ким уьлги болган экен? – деген соравыма, Наида куьлемсиреп: «Баьри тенъ кызлар сайлаган кеспиди сайладым, солардан калмай, мен де медсестра болдым», – дейди ол. Тек буьгуьн кайтип сайлаган болса да, сайлаган кесписине алал болып куллыгын бардырады. Ол окувын битиргеннен сонъ, ис аьрекетин Ногай районы бойынша Орталык больницасынынъ хирургия боьлигинде баслайды. Сол йылларда Наида аьел де курады. Оннан сонъ ога сол ок больницадынъ реанимация боьлигинде, терапия кабинетинде (поликлиникада) ислемеге туьсти. Ол терапевт пен бир ис аьрекетин бардырган заманларында, онынъ ис бардырувына оьзим де неше кере шайыт болганман, дайым сол кабинетке кирсенъ, врач йок болса да, Наида Байгараева оьзининъ йылы куьлемсиреви мен, ийги соьзи мен сени йолыгатаган эди. Мунда ол 13 йыл узагында аьрекетин бардырды. Оннан сонъ, бир йыл узагында Наида Аджимамбет кызы ООО «Транснефть» учреждениесинде де иследи. Аьли болса, Ногай район Орталык больницасында балалар стоматология кабинетинде ислеп туры эди, тек аьллерге коьре, буьгуьнлерде Ногай район Орталык больницасынынъ етекшисининъ аьризесине коьре, терапия (провизорда) боьлигинде ислеятыр. Наида Байгараева кайсы ис орынында ислесе де, ол оны ярасыклап келеди. Онынъ сога шайыт Сый грамоталары да бар.

Наида оьзи Аскер Байгараев пен татым аьел курып яшайды, аьелде аьли доьрт бала тербияланады. Байгараевлердинъ аьели оьз баласын йойып, кайгылы куьнлерди де оьттилер. Тек тыпак, бир-бирисине амырак, суьйим сезими болган аьел кайдай кайгыды да, кыйынлыкты да басыннан оьткерип болады.
Аьли болса, олар тунъгыш кызы Юлдуздынъ уьйкен етимислерине эм кишкейлерининъ – кызы ман эгиз увылларынынъ йигерли абытларына суьйинип, йойган увылына еннетти тилеп турадылар.

Наида ман бирге буьгуьнлерде енъил болмаган исти онынъ ис йолдасы Людмила Викторовна Атаева да бардырады.

Ол да Ставрополь каласындагы медициналык окув ошагын уьстинликли окып битиргеннен сонъ, ис аьрекетин Ногай район Орталык больницасында баслайды. Баслап, поликлиникада, онкология кабинетинде ислейди, оннан сонъ Ногай район япсарларында ерлескен аьскер боьлигинде де ислемеге туьсти. Бакты Людмилады Санкт-Петербург каласына да аькетти. Сонда да ол оьзининъ ис аьрекетин намыслы толтырган. Болса да, шоьлде тувган-оьскен аьдем оьз ериннен коьп заманларга армаганда турып болмайды. Ол тагы да оьзи билген эм аьруьв таныган, янына якын шоьлине кайтады, тагы да Ногай районы бойынша орталык больницасында ислеп баслайды: неврология, хирургия, буьгуьнлерде элимизди каплап алган зарарлы маразлыларды эмлев уьстинде ислейди.

Людмила Викторовна Атаевады таныган ювык кыймасы Румия Аджиева:

– Люда мени мен бир класста окыган, экевимиз биринши класстан алып кыймас болганмыз, куьни буьгуьнге дейим де катнасымызды уьзбеймиз, сырымыз бан да боьлисемиз. Ол класста кайсы затты да уйгынлавшы эди. Аьли де бизди классымыз бан йыйнайтаган да ол болады.

Людмила Виктор кызы буьгуьнлерде кызы ман увылынынъ етискен уьстинликлери мен куьезленип яшайды. Олар болса, анасын тек суьйинтпеге шалысып, биреви ис аьрекетин, экиншиси окувын бардырадылар. Балалардынъ наьсибиннен баска анага тагы не керек?!

Орта медициналык куллыкшысынынъ кеспи байрамы келгенде, мен бу медициналык куллыкшыларга эм солар ман бир сырада турып, буьгуьнги тыныш болмаган исти толтыратаганларга ак юрегимнен ден савлыкты, узак оьмирди йорайман.

Меним йоравларыма буьгуьнлерде сол каарлы мараз бан зарарланган, Москва каласыннан Курасхан Юсуровна Летина да косылады. Ол мага эмленетаган ериннен тел согып, буьгуьнлерде сол Ногай район Орталык больницасында уйгынланган госпитальде ис аьрекетин бардыратаган кызлар: Наида Байгараевага, Людмила Атаевага, Надия Нургишиевага, Марина Шангереевага эм санитаркалар О.Байрамешовага, М.Сан- гишиевага, А.Арикбаевага, М.Дильманбетовага эм баскаларга оьз разылыгын билдиреди.

– Мен оьзим Москва каласында яшайман, 35 йылдан бери шоьлде болмаганман, коькек айынынъ ызында бу яклардагы ювыкларыма кыдырып келип, оьзимнинъ ден савлыгымды осал коьрип, Ногай район Орталык больницасына туьстим. Мени мунда кайтип аьруьв йолыктылар, авырувымды да эмлейдилер. Баслапкы куьнлерде больницадынъ инфекция боьлигинде эмлендим, аьли терапиядагы госпитальде ятырман, тезден уьйиме де сав болып шыгаман. Баьри ийгилик те мен йогарыда белгилеген кызлардынъ кеспилик усталыгы ман болды. Элимиздинъ бас каласында яшасам да, мундагыдай эмлевди де, аьдемге каравды да, катнасты да коьрмегенмен, уьйкен савболымды айтаман Ногай район Орталык больницасынынъ куллыкшыларына, – дейди Ногай районымыздынъ конагы Курасхан-абай.

Колларыннан келген коьмегин аьр бир медициналык куллыкшысы этеди. Медицина тармагына ис аьрекетин бардырмага юреги юмсак, языксынув сезимин билмеген аьдем бармайды. Олардынъ эткен ислери тек сейирсинуьвге калдырады. Дурысын айтсак, оьзим орта медициналык куллыкшысын бир яркырап янган шырак пан тенълестиремен, олар коьмген ийне авырувынъды тындырып, яшавга бир сеним эндиреди. Авырувлы аьдемлер соны бек аьруьв анълайдылар.

Кеспи байрамынъыз бан, аявлы орта медициналык куллыкшылары!

Г.Сагиндикова,
РФ Журналистлер союзынынъ агзасы.
Суьвретлерде: Наида Байгараева кызы ман; Людмила Атаева.