1917-нши йылдан сонъ Баспа куьни 5-нши майга коьшириледи, неге десе сол куьн «Правда» совет газетасы шыгып баслаган куьн деп саналган. Соны ман байланыста Россия Баспа куьни Совет Баспа куьни деп туьрлендирилген. Муннан 74 йыл оьтип, 1991-нши йылдынъ 28-нши декабринде алдынгы РСФСР Оьр Советининъ Президиумынынъ «Россия Баспа куьни акында» деген токтасы ман Россия Баспа куьни оьзининъ тарих куьни 13-нши январьге кайтарылады.

     Халкымыздынъ баспа тарихи коьп ягыннан совет йыллары ман байланыслы. Айтпага, 1931-нши йылда ана тилимизде бизим алдынгы Караногай районында «Кызыл байрак», 1938-нши йылда Черкесскте «Кызыл Черкес» газеталары баспадан шыгадылар. Соьйте келе, совет йылларында ногай тилинде биринши букварьлер, окув китаплери, сонъында белгили авторларымыздынъ айырым китаплери, ортак йыйынтыклары, илми-тергев куллыклары, биринши ногай журналлары баспаланып, оьз окувшыларын табадылар.

      Буьгуьнлерде ана тилинде халкымызда «Шоьл тавысы» эм «Ногай давысы» республикалык газеталары, бир неше журналлар, Дагестан эм Карашай-Шеркеш издательстволарында художестволык эм окув китаплери баспаланадылар.

      Кеспи байрамымыз бан байланыста «Шоьл тавысы» газетамыз бан коьп йыллар тар байланыс тутып, оьзлерининъ художестволык асарларын эм макалаларын, очерклерин баспалап келетаган авыл хабаршыларымыз Сыдыйык Муталимовка, Аминат Сариевага, Анвар-Бек Култаевке, Сраждин Межитовка, Алибий Каплановка, Курман Болатовка, Салимет Майлыбаевага эм коьп баскаларга разылык билдиремиз.

     Баьри газета окувшыларымызды келген Янъы 2019- ншы йыл эм Россия Баспа куьни мен кутлап, аьр бир аьдемге берк ден савлыкты, янъы уьстинликлерди, коьп яхшылыкты эм наьсипти йораймыз.