Биз йогарыда келтирилген программа эки модульден туьзилген эм Сырт-Кавказ регионларынынъ оьрленуьвининъ маьнели соравларын шешуьвге багысланган. Сол программадынъ биринши кезеги оьткен йылдынъ караша айында озгарылган эди. Экинши кезеги Махачкалада, Дагестан Патшалык халк хозяйстволык университетинде, увыт айдынъ 4-нши куьниннен алып 7-нши куьнине дейим оьткериледи. Сонынъ тамамларына коьре, программа катнасувшылары ман эртеректен аьзирленген проектлер республика етекшилери алдыларында якланаяк. 

«Буьгуьнлерде бизим элимиз эм сонынъ ишинде Дагестан Республикамыз да, уьйкен куьши мен субъектлер санында болса да, тыныш болмаган заманларды басымыздан оьткеремиз. Россия Президенти В.Путин «Единая Россиядынъ» XVIII съездинде соьйлегенде, булай деген эди: «Буьгуьнлерде савлай дуныя трансформация аьлинде: бек куьшли де оьрленуьви мен. Эгер биз сондай аьлде оьзимизге не керегин тез анъламасак, тез керек затларды этпесек, заман ман бирге абытламасак, дайымларга артта калмага боламыз». Владимир Васильев те бу куьнги йыйында сол ойды билди эм заман ман бирге абытламага шакырды.

Оьзининъ соьзин тамамлай келип, Владимир Васильев йыйылганларды аьр бир исти биргелесип басламага эм бардырмага шакырды. 
«Биз армаганда да талаплы яслар ман ис аьрекетимизди бардырмага шалысаякпыз», – деген ойын айтып, соьзин тамамлады.

Г.Сагиндикова.