Авызы бар десе йоктай,
Нешакыл еседе тоймайды. (Ер карыны)

Аспаннан не зат ерге тоьгилмес. (Юлдызлар)

Ак атай сав кеше койлар багады. (Ай, юлдызлар)

Ай ман келер, куьн мен кетер. (Юлдызлар)

Алтын йип эсиктен кирмесе,
Тесиктен кирер. (Куьн коьзи)

Авлагым кенъ дазувсыз,
Койларым коьп санавсыз. (Аспан, юлдызлар)

Аязда уьсимес, шилледе терлемес. (Ай)

Ак кой турып кетти,
Кара кой ятып калды. (Кар, ер)

Атасы куьмис аяктай,
Анасы алтын табактай.
Баласы кызыл балыктай,
Конъысы ак мамыктай. (Ай, куьн коьзи, юлдыз, булыт.)

Аспанда тувады, тоьменге карайды. (Ай)

Анамды алар карны йыртык элек,
Атамды алар карны йыртык элек. (Ер)

Алкар-малкар сув уьстинде,
Сары табак калкар. (Ай)

Айланасы такыр,
Айланасында курт-кумырска болмас. (Ай)

Ак явлыгына тат тиймес,
Авлагына оьлен-шоьп битпес. (Ай)

Ак тавык,
Касында шоьпленмеген тары. (Ай, юлдызлар)
 
Алтын кылыш кумга туьсер,
Шанъга батпас. (Куьннинъ коьзи)

Атамнынъ коьк тоны бар,
Ябынмага бойы етпейди.
Анамнынъ ак булы бар,
Алмага колы етпейди. (Коьк, ай)

Айланаста эки аданас,
Бир-бирине етеалмас. (Куьн коьзи, ай)

Айтайым юмак,
Бири сары, бири ак.
Олар аданас,
Ойла карындас. (Куьн коьзи, ай)

Ак сандыгым атылар,
Алтын йип шашылар. (Куьн коьзи)

Аягы йок, басы бар,
Алтын юзи-касы бар. (Куьн коьзи)

Аксамда коьзин юмар,
Танъда коьзин ашар. (Куьн коьзи)

Абыт алмайды, юреди,
Арымайды, талмайды юреди. (Ер)

Ак кийгизди кага алмадым,
Кызыл тарыды туьсире алмадым. (Коьк, юлдызлар)
 
Аяздан коркпас, шилледен кашпас. (Ай)

Ак табак, алпыс оймак. (Ай, юлдызлар)

Асты ети кабат,
Уьсти ети кабат.
Ортасында сары кабак,
Шетинде кара юн. (Ер, коьк, куьн коьзи, кара булыт)

Ак казан касында,
Алпыс коьмир яйрап ятыр. (Ай, юлдызлар)

Ак тавык кызыл тары шоьплейди. (Ай, юлдызлар)

Алты торгай бийикте бар,
Куьн коьзинде уйкламага ойы бар. (Алты юлдыз)

Алтын орак айланады,
Орылган тары шашырайды. (Ай, юлдызлар)

Ай ман келер,
Куьн мен кетер. (Юлдызлар)

Алтын таягы шилледе аявсыз. (Куьн коьзи)

Ак сандыкка салып,
Кызыл электи киртлемессинъ. (Куьн коьзи)

Алтын калкан кырк кылышлы. (Куьн коьзи)

Алтын келсе,куьмис кетер. (Куьн коьзи эм ай.)

Ак табакта увак таслар. (Ай,юлдызлар.)

Ак оймак, кырк саьдеп. (Ай, юлдызлар)

Артпакка кара топыракты сыйдыра алмадым. (Ер)

Атамнынъ кара тонын,
Коьтерип болмассынъ. (Кара ер)

Алтын кеме,
Туьпсиз тенъизде юзийди. (Ай)

Ак карбыз бар, язда солымайды,
Кыста уьсимейди, тонъмайды. (Ай)

Алтын кылыштан кан таммас. (Куьн коьзи)

Бар меним карбызым,
Карасам тоймайды назарым.
Кыста карбызым уьсимейди,
Язда карбызым ширимейди. (Коьк куьмбези)

Бир коьк туьсли аякта,
Кырк кызыл кумалак. (Аспан, юлдызлар)

Бири куяр, бири ютар. (Коьк, ер)

Бир шатыр бар, тиревсиз,
Туьймеси бар, йипсиз. (Коьк, юлдыз)

Булыттан шыгар,
Ерге туьссе капканга туьспес. (Куьн коьзи)

Бабамнынъ тоны бар,
Ябынып болмайман.
Иши толы ынжы,
Санап болмайман. (Аспан, юлдызлар.)

Биз-биз эдик,
Биз ети кыз эдик.
Бир такпага тизилдик,
Танъ атканда йок болдык. (Етеген)

Батпай кетпес. (Куьн коьзи)

Буз уьстинде йылтыраган,
Бийдай уннан кашпаган.
Ак кабак уьсимеген,
Балалары бесикке боьленмеген. (Ай, юлдызлар)

Батар сары кавыннынъ,
Туваяк куьни бар. (Куьн коьзи)

Бар бир ана,
Анада бар сансыз ана. (Ай, юлдызлар)

Тагир Акманбетов.