Сабират Эсманбетовна Терекли-Мектеб авылында 1949-ншы йылдынъ 7-нши март куьнинде тувган. Район орталыгынынъ мектебинде 1-нши класстан 9-ншы класска дейим окыган, 9-10-ншы классларды Махачкаладагы мектеб-интернатта окып кутарган. Билимге талпынган кызалак Г.Цадаса атындагы Дагестан патшалык педагогикалык институтына туьседи эм соны уьстинликли окып битиреди.
Сабират Эсманбетовна Терекли-Мектебтеги Ораковлардынъ уьйкен аьелинде тербияланып оьскен. Ол бала заманнан коьп китаплер окымага, китапханаларда болмага, кайсы ерде де янъы китаплер сатып алмага суьетаган кыскаяклы. Сол зат онынъ ишки дуныясын байыткан, совет заманындагы окытувшыга келисли кайсы яктан да билим алмага амал берген.
Сабират Эсманбетовна окытувшы кеспиди босына сайламаган. Ол балаларды суьетаган эм балалар уьшин яратылган окытувшы деп саналган. Аьр бир баладынъ хаьсиетин-кылыгын тез анълайтаган, аьр бирисине тийисли кепте янасып билетаган специалист эди. Ол окувшыларына юмсак эм йылы кепте карайтаган, ама керек ерде каты да болатаган оьз заманындагы сулыплы окытувшылардынъ бириси болган. Сабират Эсманбетовна балаларга диктант, изложение, сочинение яздыра калса, коьп аьллерде табиатка, тоьгерек яктагы ыспайылыкка оларда суьйимлик тувдырмага шалыскан.
Ол мектебте ислейтаган йылларда уьйине оьзи мен бирге ислейтаган окытувшы йолдасларын йыйнамага бек суьетаганын окытувшылар эскередилер.Олар окытувшыдынъ таза йылы уьйинде олтырып, ис аьрекети, яшав акында саьатлеп хабарлаганлар.
Сабират Эсманбетовнадынъ оьз окувшыларына берген танълык, ис суьерлик, ыспайылык дерислери босына кетпеген, неге десе сол сезимлер эндигиси олардынъ юреклеринде яшайдылар.
С.Оракова бала заманыннан алып спорт пан уьйкен дослык тутып келген. «Уьйкен класс-ларда мен Махачкалада енъил атлетика бойынша балалар-яслар спорт школасына юргенмен. Сол йылларда биз республикада оьткерилетаган коьп ярысларда, соны ман бирге Саратовта, Пятигорскте юритилген спартакиадаларда, баска туьрли спорт базласувларында катнасканмыз. Окув йылларында тренировкада алган ярамнан себеп, баска спорт кеби – ориентирование мен аьвлигип басладым. Бу спорт кебининъ программасына туризм мен байланыслы туьрли оравлыкларды оьтуьв, берилген маршрут йорыгы ман ерди танып билуьв бойынша сынавлар киргистилген эди.
Биз сол 1970-нши йыллардынъ басында Дагестан туристлерининъ слетларына, республикалык базласувларына йыйы катнаганмыз. РСФСР Кубыла зонасы бойынша оьткерилген Дондагы Ростов каласындагы ярысларга да барганмыз. Солай ок Воронежде, Подмосковьеде, Приэлбрусьеде болып озатаган сынасларда да ортакшылык эткенмен», – дейди С.Оракова яслык йылларын эскерип.
Сол ярыслардан онда аьлиге дейим сакланган 1-нши орынлы дипломлары, грамоталары сакланады. Ол 1970-нши йылларда ориентирование спорт кеби бойынша Дагестан чемпионкасы деген уьстинликке де етискен.
Аьлиги заманда Сабират Эсманбетовна тийисли тыншаювында. Хатын-кызлар куьни онынъ уьшин эки кабат байрам, неге десе сонынъ алдындагы 7-нши март — йыл сайын онынъ тувган куьни. Быйылгысы онынъ уьшин уьш кабат байрам демеге де ярайды, сол куьн Сабират Эсманбетовнадынъ сыйлы ясы, ога тувганлы 70 йыл толады. Сол йыллары онынъ уьшин босына кетпеген, ога эсине алгандай коьп саьвлели таза эм эстеликли эскеруьвлер калганлар. Энъ баалысы, оны таныган эм сыйлаган аьдемлер, оны мутпаган окувшылары бар.
М.Юнусов.
Суьвретте: С.Оракова.
