Йыйынды Дагестан Республикасынынъ Аькимбасы аша келип, бу йолыгыстынъ бас мырады – билимлендируьв тармагында аьллерди ийгилендируьв экени акында билдирди.

Солай ок ол, Илми эм билимлендируьв тармагында тергев бойынша Федераллык службасынынъ етекшиси Сергей Кравцов бизим республикага бир неше кере келип, билимлендируьв тармагында оьткир соравларды шешуьв уьстинде куллыклар этетаганын да айтып кетти. 

В.Васильев республикамызды етекшилеп баслаганлы бери айлак та коьп кетпеген болса да, сол болжал ишинде Россиядынъ 28 министерстволарыннан эм ведомстволарыннан специалистлер Дагестан Республикасында болып кеткенлер. Олардынъ аьр бириси бизим республикада, регионымызды янъы оьрленуьв дережесине шыгарар мырат пан, шаралар озгарганлар. 

Республикамыздынъ Аькимбасынынъ айтувына коьре, йылдан-йылга бизде Ортак патшалык сынавларды оьтуьв сапаты ийгиленип барады, сынавларда йогары балларга беретаган окувшылар саны да оьседи. Оьткен окув йылда сынавларды оьте алмаганлар саны эки кере тоьмен болган. Ортак патшалык сынавларда 80 балл алган окувшылар саны 232-ге оьскен, 19 окувшылар 100 балл алганлар. Ама биз буьгуьнлерде маьселелер йок деп айтып болмаймыз. Билимлендируьв тармагында Ортак патшалык сынавлар маьселелери аьли де бек актуальли болып турады. 

Сергей Кравцов болса, йыйында ортакшылык эткен Ортак Патшалык Сынавлардынъ уйгынлавшыларына, муниципалитетлер етекшилерине, аьр бир Ортак Патшалык Сынавлар оьткерилетаган ерлерде медициналык куллыкшылар оьз аьрекетлерин бардырмага кереги акында билдирди. Солай ок правойорыкты саклавшы органлардынъ куллыкшылары да оьз куллыкларын сол ерлерде этпеге кереклер – тийисли йорыкты туттырып болув. 

Бу йыл да, оьткен йыллардадай болып, Ортак патшалык сынавлар оьткерилген шакларда федераллык каравшылар болаяклар.

Ортак патшалык сынавларына эндигиси бир айга ювык заман калып туры. Сога толы кепте аьзирлик коьруьв уьшин артык эс берилмеге тийисли.