19-20 августта Махачкалада Киров районынынъ Сулак авылында 11-нши «Шоьл баьтирлери» деген эркин куьреси бойынша савлай ногайларынынъ ярысы оьтеек. «Шоьл баьтирлери» деген проекти 2006-ншы йыл Дагестан Республикасынынъ Ногай районынынъ Терекли-Мектеб авыл ясларынынъ ойы бойынша яшавга шыгарылды. 2010-ншы йыл Россияда ногайлар яшайтаган регионларында озгарылып басланды.
Мине 11 йыл бойы Россия еринде спорттынъ эркин куьрес кеби бойынша ярыс ийги куьрескен ногай йигитлерди йыйнап келеди. Бу йыллар ишинде тек география тувыл, катнасувшылардынъ усталыгы да оьсип келеди. Шарадынъ энъ маьнелиси - ярыс оьтуьв регионнынъ этномаданиятлык аьдетлерин коьрсетуьв болады. Ярыстынъ озгарылувы - ногай ясларынынъ бирлесуьвине, кардаш байланысларды патриотлык тербиялавы ман беркитуьвге, баска болып регионлар ара катнасувды оьрлендируьвге уьйкен амал болады.
Аявлы йолдаслар! Бу исси тыншаюв куьнлеринде Сулак авылына оьз усталыгын коьрсетпеге суьйген, уста куьресип болган ногай йигитлери йыйналаяклар. Коьплеген яс спортсменлерине - ол бек саклаган спорт ярысы болады.
«Яслык» деген Яслар орталыгы атыннан спортсменлерге енъуьв йолына аькелген тиресуьвди, ийги куьрести коьрсеткенди йорайман.
С-А. Сарсеев, «Ногайский район» МО «Яслык» Яслар орталыгынынъ етекшиси.