Йол юрис кавыфсызлыгынынъ патшалык инспекциясында (ГИБДД) боьликлер аз тувыл. Аьр бир боьликтинъ оьз баскалыгы эм спецификасы бар, ама коьп гражданлар уьшин ГИБДД – ол йол-патруль службасынынъ инпекторлары. Водительлердинъ бир кесеги «гаишниклерди» суьймейди, неге десе йол инспекторлары оларга йол уьстинде эркин кепте «ланъкаламага» ыхтыяр бермейди. Дурыс, бирерде патшалык йол автоинспекция тармагында оьз киселерининъ теренлигин ойлайтаганлар да йолыгадылар. Ама ГИБДД куллыкшылары болмайтаган болса, бизим йолларда не болаягын сийрек ким айтып болар.
Йол-патруль службасынынъ оьзининъ айырым ис спецификасы бар. ДПС инспекторы йол тергев специалисти кебинде орам-йоллардынъ аьллерин, техника тергев инспекторы кебинде йол коьликтинъ аьллерин, пропаганда боьликтинъ куллыкшысы кебинде водительге эм яяв юретаганларга йол юрис кавыфсызлыгынынъ правилоларын сабыр этип анълатып билмеге тарык. Оннан баскалай, ДПС инспекторлары йол юрисининъ йорыгынынъ тутылувы артыннан карай берип, кыянатлык пан куьрестинъ де алды планында турадылар. Урланган автомашиналарды излестируьв, йол уьсти мен аькетилетаган наркотиклер мен туьбек-тапаншады табув, закон яваплылыгыннан ясырынатаган кыянатшыларды ыслав – бу да ДПС куллыкшысынынъ аьр куьнлик куллыгы.
Оьткен йыл Дагестан МВД-нынъ патшалык автоинспекциясына туьзилгенли 80 йыл толган. ДР иш ислер министри Абурашид Магомедов йол инспекторлары алдында уьйкен яваплы борыш – гражданлардынъ яшавын эм савлыгын саклав ниет пен йолларда кавыфсызлыкты канагатлав борышы туратаганын белгилеген. «Ол врачтынъ исиндей эм аьдем савлыгын саклав ман каьр шегетаган баска аьдемлердинъ куллыгындай саваплы куллык. Бизим ГИБДД, патруль-пост эм МВД-нынъ оьзге службаларынынъ куллыкшыларынынъ эрлигине бас иймей болмайсынъ. Олар йол инспекторларына, куллыкшыларына шапкынлык, баска туьрли кыянатлыклар болып турганына карамастан, эр кепте ислегенлер эм орамнан кетпегенлер. Кайдай кыйынлы заманларда да ГИБДД куллыкшылары оьзлерининъ яшавын курманлыкка шыгарып, йолларда кешеси-куьндизи мен ис борышын толтырганлар. Мен йол-патруль службасынынъ бир куллыкшысы да бир заман да оьз постын калдырып кетпегени уьшин оьктемсиймен, Ол зат республика МВД-нынъ бети. Ол зат дагестаншыларды йигит аьдемлер этип коьрсетеди», – деген ол.
Авыр ямагат-политикалык эм кыянатлык аьллери мен белгили Дагестан Республикасында автокоьлик тармагында баьле-кателердинъ алдын шалув
маьнели социал-экономикалык маьселелердинъ бириси болады. Ызгы йылларда автокоьлик алатларынынъ санынынъ оьсуьви эм орам-йол тармагынынъ аьллери арасында оьсип баратаган диспропрорциядан тура бу маьселе айырым аьлде оьткирлене береди. Соны ман байланыста ГИБДД куллыкшылары тербиялав-ыхтыяр ис аьрекетинде белсенли катнасадылар, республикадынъ савлайы йол-коьлик тармагы бойынша нызамды беркитуьв уьшин куьреседилер, коьлем информация амаллары ман тар байланыс тутадылар.
Соны ман бирге республика ГИБДД куллыкшыларына аьли де коьп ис борышларды шешуьв керегеди. Энъ де баслап, кеспи, билим эм маданият оьлшемин оьстирмеге борышлы. Патшалык автоинспекциясынынъ аьр бир куллыкшысы оьз участогында абырайлы, аьдемшил эм, ис аьрекетининъ катылыгына карамастан, закон талаплавларын толтырувда властьтинъ таза намыслы ваькили болып калмага керек.