Тагы бир окув йылы битип, юзлеген окувшылар уьйкен яшав йолына шыгадылар. Артта завыклы бала шак, куванышлы танапыслар, билим алган дерислер, окытувшылардынъ салган белгилери. Алдыда тыныш болмаган, бир де кыйын, бир де тыныш яшав сынавлары. Ол да бактыга коьре. Аьли уьшин выпускниклердинъ бас борышлары ортак патшалык сынавларды уьстинликли оьтуьв.
Буьгуьнлерде сол сынавлар да ызына ювыклап келеди. Бу окув йылдынъ ызында Ногай районы бойынша Ортак патшалык сынавларды(ЕГЭ) 121 эм 1 дистанционлы окув бардырган, Негизли патшалык сынавларды (ОГЭ) 276 окувшылар оьтедилер. Сол санларда 11-нши класс кутылатаганлардынъ ишинде 6 окувшы эм 9-ншы класс кутылатаган окувшылар ишинде де сол шаклы – енъил аьллерде (авырувлы балалар) сынавларды оьткенлер.
- Бу сынавларды берип баслаяктан алдын тийисли аудиториялар аьзирленгенлер. Солар баьри де видеокамералар ман канагатланганлар. Аьр бир боьлме, балаларга олтырмага ер белгиленген. Аьр бирисинде сынавларды уйгынлавшыларга да орын белгиленген. Школага кирген ерде темир алатлардынъ барлыгын белгилейтаган алат та курылган эди. Кыскаша айтканда, баьри тийисли йорыклар да тутылганлар, - дейди Билимлендируьв Управлениесининъ специалисти Орталык патшалык сынавларынынъ муниципаллык координаторы У.Кокурова.
Эндиги алдыда бир сынав калган. Сол сынавды да бергеннен сонъ тамамлары акында соьйлермиз. Тек бу ерде оьз ойымды да айтпай озып болмайман. Оькен йыллар ман тенълестиргенде, бу йыл алдынгы йыллардай болып, балаларымыз Ортак сынавларды оьтетаган А-Х.Джанибеков атындагы школасынынъ алдында, азбарына тармаскан ата-аналарды да, кашып-пыскан, тыгылып сынав куллыкларын эткен окытувшыларды да коьрмедик. Ата-аналар уьйренгенге усайды яде болса, окытувшылар оьзлерининъ билимлерин йогары дережеде берип, окувшылар алган билимлерине сенип баслаганлар.
Г.Сагиндикова.
Суьвретте: сынав оьтеди.