Гульжамал Мингажутдиновна Мурзаева Ставрополь крайында
1919-ншы йыл тувган. Душанбе каласында мамык-кагыт промышленности лаборантынынъ 6 айлык курсын тамамлайды. Ногай кыскаяклы бала шагыннан окытувшы болмага деген мырат этеди. Гульжамал Мурзаевадынъ мырады 1938-нши йыл яшавга айланды. Ол Кизляр каласындагы педучилищеге туьсип, оны уьстинликли битиреди. Окытувшылык кесписин байырлаган кыскаяклы оьз аьрекетин Кизляр районынынъ Огузер авыл баслангыш мектебинде баслайды. Ога 1943-нши каты, авыр согыс йылларында баслангыш классларын етекшилемеге бакты буйырады. Ол авыл, ямагат эм мектеб яшавында белсенли катнасып келеди. Кайдай ис тапшырылса да, окытувшы оны яваплы, сонъына дейим еткермеге шалыскан. Ол кыскаяклылар советининъ председатели аьрекетин 7 йыл юритеди. Оннан сонъ комсомол, партия организацияларынынъ секретари, мектебте профком етекшиси аьрекетин уьстинликли толтырып келген. Савлай янын салып, яшавын багыслаган ис аьрекети емисин берген заманы да болды. Исинде коьрсеткен уьстинликлери уьшин кыскаяклы ДР-нынъ ат казанган окытувшысы деген сыйлы атына тийисли этилген, "Оьрметли иси уьшин" деген савгасынынъ иеси болган. Коьримли иси уьшин ога коьп кере Сый грамоталары да тапшырылган. 1967-нши йыл билимлендируьв тармагында коьп йыллар минсиз иси уьшин онынъ аты районнынъ сый китабинде орын табады. Билимлендируьв тармагында, ямагатлык яшавында ол тек белсенли аьрекетши болып калмай, язувшылык оьнери болган, оьз ойы ман мынълаган окувшылар ман газеталар аркалы боьлисип келген хабаршы да болган. 50 йыл узагында ол "Шоьл тавысы" эм Кизляр районларында шыгатаган газеталар, баспа издательстволар ман тар байланыс тутып келген. Газета окувшыларына болса, язувшы
кыскаяклыдынъ ятлавлары, хабарлары, макалалары ман таныспага амал болган. Онынъ яшав айкаслары акында язган ятлавлары, хабарлары, макалалары китаплерге айланып, туьрли йылларда дуныя ярыгын коьргенлер.
Гульжамал Мурзаева ногай окувшылары 4-нши класстан сонъ окувын бардырсын деп, коьп кыйынын, куьшин салып келди. Сол маьселе акында йогары органларда, газета бетлеринде коьтеруьви аркалы, Огузер авылдынъ окувшыларына баска ерге кетип окымай, ерли орта мектебте окувын бардырмага амал тувды. Халкын билимлендируьвге савлай яшавын багыслап келген кыскаяклы болып калмай, ол татым аьелин курган наьсипли ана да болады. Ол 7 аьвлетин оьстирип, яшав йолына салган. Атадан коьрген ок атар, анадан коьрген тон пишер дегенлей, Гульжамал Мингажутдиновнадынъ эки уьйкен кызлары, анасынынъ йолын алып, билим тармагынынъ алал куллыкшылары болдылар. Уьйкен аьелдинъ бийкесине "Материнство" савгасы эм "Ана оьрмети" деген lll дережели ордени тапшырылган. Онынъ атын буьгуьнлерде Огузер авылынынъ орамы оьктемли юритеди.
2001-нши йыл Гульжамал Мурзаева арамыздан кешкен болса да, сыйлы окытувшыды, белсенли аьрекетшиди авылынынъ яшавшылары, мектеби дайым йылувлык пан эсинде саклайды, эткен иси, кыйыны аьр кайсысынынъ юрегинде ярык эстелик болып яшайды.
Г.Нурдинова.