Янъыларда Дагестан патшалык педуниверситетининъ ректоры профессор Магомед Абдулаевтинъ «Ногайский район» МО аькимбасы Казмагомед Янбулатов пан йолыгысы болып озды.
Йолыгыс «Ногай тили: саклав эм оьрлендируьв» деген тематикалык тоьгерек стол озгарылаягына аьзирлик коьруьв мен байланыслы эди. Ол ногай интеллигенциясы, министерстволар эм ведомстволар, илми учреждениелер эм институтлар, республикалык коьлем информация амаллар эм ямагат организациялар ваькиллерининъ ортакшылык этуьви мен ДГПУ майданында озгарылаяк.
ДГПУ ректоры Магомед Абдулаев эм «Ногайский район» МО аькимбасы Казмагомед Янбулатов форумнынъ уйгынлав комитетин туьзуьвди шарада катнасувшыларды ойластылар.
Хабарласув барысында Магомед Абдулаев ДГПУ етекшилиги эм окытувшылары алдында туратаган маьнели борыш баьри ямагат тармакларга кирискен, диалог уьшин ашык янъы яслар несилин тербиялав экенин белгиледи.
«Сонынъ уьшин бизим йогары окув ошагында баьри керекли аьллер (яшав, тамакланув, спорт секциялары) туьзилген, а студентлер болса туьрли социаллык проектлерде катнасадылар. Ама энъ маьнелиси: университетте стедентлер билимли специалистлер мектеблерде балаларды окытаяк педагоглар болмага, окув ошакларда билимлендируьв эм тербиялав аьрекет аьлин туьзбеге кереклер», – деп белгиледи Магомед Абдулаев.
«Ногайский район» МО аькимбасы Казмагомед Янбулатов бу йогары окув ошагында окытув аьрекети кеспили уйгынланатаганы коьринетаганын, окув ошагынынъ етимислерине эм шараларына, боьтен де Дагестан халкларынынъ ана тиллерин яклав бойынша, маьне беретаганын, ДГПУ-дынъ дагестан филология факультетинде ногай тил боьлигин туьзуьв ногай маданиятын оьрлендируьвге уьйкен уьлитс косатаганын белгиледи.
Мунда окувдан баска болып, яслардынъ анъ-эдап яктан тербияланувы маьнели: ол – окув ошагында ийги этип салынган аьрекет, яшавдынъ спорт кеби, ол – студентлердинъ дуныяга эм тоьгеректегиге карасы… ДГПУ-дынъ билимлендируьв эм тербиялав аьрекетинде бу баьри заттынъ барлыгы
суьйинтеди», – деп белгиледи «Ногайский район» МО аькимбасы Казмагомед Янбулатов.
Ногай районынынъ ямагаты атыннан Казмагомед Янбулатов ДГПУ ректоры Магомед Абдулаевке ногайлардынъ тарихи эм маданияты акында китапти савкатлады.