Ис йолдасымыз акында ____________
Эс. Аьлемет зат сол эс деген, ол аьдемге кесек заманга болса да оьткен заманды, ислерди, бирге яшаган эм ислеген аьдемлердинъ келпетлерин кайтарып болады. Соьйтип кайтарады эс бизге эндигиси арамыздан ахырет дуныяга кеткен кардаш-ювыкларымызды, тенъ-досларымызды, ис йолдасларымызды. Олар да биз, оларды билген эм таныган аьдемлер, оьзимиз не шаклы яшасак, сол шаклы бизи мен бирге яшайдылар. Биз тек бир затты айырып белгилемеге суьемиз: миллет газетамыздынъ редакциясында эм типографиясында ислеген аьдемлер оьзлери коьпте тайып кетселер де, атлары бизден сонъ да оьмирге яшап калады. Калады, неге десе газета – ол халкымыздынъ яшавы, онынъ тарихи, кайратлы иси, кайгысы эм куьези.