Карашай –Шеркеш республикасында Халк маданиятынынъ орталыгы ашылмага каралады. Онынъ бас аьрекети халк санияты эм маданияты, анъ аьдетлери булагына яс несилдинъ эсин эттируьвге каратылган.
– Орталыкты биз бу йылдынъ ызында Эркин -Халк авылында ашпага мыратланамыз. Сулыплы окытувшыларымыз балаларга Карашай-Шеркеш республикасында яшайтаган халклардынъ маданияты эм аьдетлери акында хабарламага болаяклар. Маданият эм тарих бойынша дерислериннен факультативлер озгармага амаллары болаяк. Солай болып, балаларды дослыкка, толерантностьке уьйретеекпиз. Орталыктынъ бас мырады яс аркадынъ регионда яшайтаган халклардынъ маданиятына, тарихине тартув болады. Аьдемлер оьз ара дин эм миллетлигине карамастан дуныяда тил- бирликте яшасын деп, оларды бала шагыннан алып сыйга эм баскаларды анъламага уьйретпеге керек.
Мектебтеги дерислерден баска, айда уьш кайта районнынъ баьри билимлендируьв учреждениелерининъ окувшылары да косымша дерислерге юрмеге болаяклар. Олар кызыклы ойынларда, тоьгерек столларда, ярысларда, викториналарда ортакшылык этееклер.
Республикамызда коьп миллетлер яшайдылар. Онйыллыклар бойы биз уьйкен аьел болып яшаймыз, бири-биримиздинъ аьдетлеримизди сыйлаймыз эм баалаймыз. Элбетте, оьсип келеятырган несил де оьзин соьйтип юритпеге тийисли. Сонынъ уьшин яслар оьзининъ маданиятын, аьдетлерин билмеге тийисли. Орталыгымызда сол баьри затларга да уьйретееклер. Педагоглар ман маьнели макалалар йыйылган. Балаларды сол зат кызыксындыраягына сенемиз, – деп белгилейди Карашай-Шеркеш республикасынынъ Ногайский район администрация аькимбасынынъ орынбасары Марина Баисова.
Суьвретте: халк маданиятынынъ орталыгы ашылувына аьзирлик коьриледи.