Бу йылдынъ 27-нши октябрь айында Кумлы авылынынъ тарихинде шатлыклы оьзгерис болып озды. Авыл маданият уьйинде капиталлык ремонты этилип, иши, кыры коьркленип, йылув беруьв батерейлери, пластик терезелери, эсиклер салынып каралды.
- Ол ислер район маданият уьйинде бу йылдынъ март айыннан алып басланды. «Строймаркет» туькени аркалы керекли курылыс материаллары ман канагатланып, А.Алиевтинъ ис бригадасынынъ кайратлы куллык этуьви мен ис ериннен козгалып баслады. Авыл яшавшылары А.Толакаев, Т.Казбулатов, С.Сатыров эм баскалалар белсенли куллык эттилер. Авылда аьрекет этетаган социаллык куллыкшылары, маданият куллыкшылары, окытувшылар, окувшылар ярдамластылар. Олардынъ баьрисине де уьйкен разылыгымды билдиремен.
Мен авыл администрациясына етекши болып келгенде, авыл яшавшыларына маданият уьйине караякпан деп соьз бергенмен эм буьгуьн берген соьзимди ысладым деп айтпага боламан, - дейди «село Кумли» МО СП администрациясынынъ аькимбасы Р.Насыров.
Онъганнынъ эки яхшылыгы бир келер деп, авыл яшавшылары сол куьн эки яхшылыкты -Ясуьйкенлер куьнин эм маданият уьйи ашылувын кенъ байрамшыладылар. Янъы коьркленген, йылувлыгы бетти шарпыган маданият уьйининъ биринши конаклары 60-тан оьткен 100-ден артык авыл яшавшылары болдылар. Сол суьйиништи боьлмеге Терекли-Мектебке коьшип кеткен, алдынгысы авыл яшавшылары болган ясуьйкенлер де ямгырлы куьнге де карамастан келген эдилер. Меканнынъ иши ясуьйкенлерге толган эди, оларга деп туьрли зияпетли аслар ман сыпыралар да аьзирленген эди.
Маданият уьйинде уйгынланган шарады авыл мектебининъ ана тил эм адабиатыннан окытувшысы С.Аджигельдиева ашты. Коьркленген маданият уьйининъ сценасын биюв оьнерин коьрсетуьви мен школадынъ биюв коллективи ярасыклады.
Оннан сонъ соьз авыл аькимбасы Р.Насыровка берилди. Ол бу меканда ремонт басланганыннан алып тамамланганша, иске сав куьшин эм коьнъилин салып ярдамын эткенлерге разылыгын билдирди. Эм йыйылган ясуьйкенлерди ба йрам ман кутлап, оларга йылы йоравларын багыслады.
-Кумлы авылына келмеге бек суьемен. Мунда досларым коьп. Р.Насыровтай йигитлер коьп болса, дуныя онъар деп ойлайман. Меканды янъыртып туры, иши де йылы. Районда 16 маданият уьйлериннен, тек Терекли-Мектеб, Карагас, эндиги Кумлы авылларында йылы болды. Келеекте баьри йыравшылар ман сизге келмеге соьз беремен, -деди «Ногайский район» МО маданият боьлигининъ етекшиси Я.Кудайбердиев.
Авыл администрация етекшисине районнынъ ямагат- маданият яшавында эткен косымы уьшин ол Сый грамотасын да тапшырды.
- Бирлик болса, баьри зат та этиледи. Авылымыздынъ яшавшыларына бу яхшылыкты, куьезди авыл етекшиси оьзининъ йолдаслары ман коьрсетип туры. Коьп йыллар бойы иши сувык, коьрки эскирип, каралмаган маданият уьйин авыл етекшиси курувшы яслар ман бирге янъырттылар. Сондай йигитлер коьп болсын. Сага эм сенинъ йолдасларынъа да берк ден савлык йораймыз, -деди Кумлы авыл ясуьйкенлер советининъ етекшиси З.Менлиалиев.
- Авылымыз уьшин янымыз бек авырыйды. Элбет те, авылды етекшилев деген бек авыр ис. Элимизде турган кризис аьли исимизди толтырмага уьйкен буршавлык этеди. Ама сол затка карамастан, авылымызда маданият уьйи янъыртылганы баьримизди де суьйиндиреди, -деди «Терекли-Мектеб» МО СП авыл аькимбасы З.Аджибайрамов.
- Буьгуьнги оьзгерис, маданият уьйининъ ашылувы баьримиздинъ де эсимизде сакланаяк. Бу авылды коьплер етекшилеп келгенлер, оьзиннен сонъ ыз калдырганлар да болдылар. Р.Насыровтынъ аты да халкынынъ эсинде сакланаяк, неге десе яшавшылары уьшин пайдалы ис этти,- деди «Шоьл тавысы» редакция газетасынынъ бас редакторы Э.Кожаева. Оннан сонъ ол 8-нши класста язган «Авылыма» деген ятлавын йыйылганларга окып эситтирди.
Ясуьйкенлерди сыйлап шакырганына разылыгын билдирип, оьз маслагатлары ман боьлисип, авыл маданият уьйининъ кызыклы тарихи, курылысы, онынъ сценасында оьткен туьрли шаралары эм онынъ катнасувшылары акында, 60 йылдан артык тарихинде ыз калдырган куллыкшылары акында сыйлы авыл ясуьйкенлери, ис ветеранлары А.Кожаева, А.Умарова, Х.Коккозов, Э.Абдуллаев, А.Мусауров, К.Умаров, М.Сатыров, К.Насыров, И.Нукаев, О.Мурзаева, Д.Черкесов, Е.Кокешова, С.Баймурзаева эм сондай баскалар эскердилер. Йыйылган ясуьйкенлерди байрам ман, авыл маданият уьйининъ ашылувы ман конаккка келген Яшавшыларды социаллык ягынннан коршалав орталыгынынъ етекшиси Г.Кпитуллаева, Карагас авыл социаллык куллыкшыларын канагатлав боьлигининъ етекшиси А.Эсенбаева, Карагас авыл орта мектебининъ ана тил эм адабиатыннан окытувшысы С. Майлыбаева, Кумлы авыл маданиятынынъ яс етекшиси С.Аджигельдиев кутладылар.
Байрамга шатлыкты ногай йыравшылары Я.Кудайбердиев, З.Аджибайрамов, Р.Яриков, М.Кишинеев, Д.Караев, Р.Эрембетов, Ш.Мамуров ногай эм орыс тилинде йырларын йырлавы ман коьнъиллерге йылувлык костылар. Йыр, сарын йырлавда оьз оьнерлерин ясуьйкенлер А.Мусауров, К.Умаров, Е.Кокешова эм сондай баскалар да коьрсеттилер.
Табиаттынъ мунълы, ямгырлы куьнине де карамастан, Кумлы авылынынъ 60-тан алып эм 80-ннен йогар ясындагы ясуьйкенлери, яслары да бу шатлыклы оьзгеристи хош алып, карс кагып, ортада бийип, йырлар йырлап, ятлавлар айтып, яхшылыгы ман бирге боьлистилер.
Сол куьн кайбир ясуьйкенлердинъ коьзинде коьз ясларды да барын коьрмеге болаяк эди. Олар авылынынъ яшавшылары коьптен сакланган мыраты толганы уьшин, онынъ ясларынынъ келеектегисининъ сеними акланганы уьшин суьйиништинъ коьзяслары эдилер.
Яхшылыгынъыз узак болсын, сыйлы авыл яшавшыларым!
Г.Нурдинова.
Суьвретте:шарадан коьринис.
