Дагестан Республикасында 2013-2018-нши йылларына Россия Федерациясында терроризм идеологиясына карсы турув Комплексли планнынъ шараларын  эм  «2016-ншы йылга Дагестан Республикасында терроризм идеологиясына карсы турув Комплексли программасын яшавга шыгарув акында» Дагестан Республикасынынъ патшалык программасын толтырувда эм Дагестан халкларынынъ бирлигин, татымлыгын беркитуьв мыратта республикамызда туьрли акциялар, шаралар оьтеди.

Янъыларда Балалар яратувшылык уьйинде савлайреспубликалык интернационаллык татымлык акция бойынша «Мен,Сен, Ол -бирге уллы эл» деген шакырув  астында тоьгерек стол уйгынланды. Мунда районымыздынъ 10 школасыннан 7-11-нши класслардынъ окувшылары катнастылар. Олар шара юритуьвши Балалар яратувшылык уьйининъ методисти Саида Зарманбетовадынъ татымлык, шыдамлык, сабырлык, шынты дослык  акында соравларына явап бердилер, хабарладылар, эристилер, оьз ойларын мысалылар келтирип айттылар. Саида Абдулалимовна балаларга туьрли уьйрететаган  кыска эртегилер, хабарлар окыды. Ол йыйылган балалар ман 5 туьрли тема карады. Айтпага, «Биз туьрли, ама биз бирге», «Шыдамлык-татымлыкка эм тил бирликке йол», «Мен, Сен, Ол-бирге татым аьел», «Неше биз-сол шакыл мен», «Шынты дослык деген не?».

Солай ок тоьгерек столга  «Яслык» яслар орталыгынынъ етекшиси Сафар Сарсеев те шакырылды. Белгиленген шарадынъ зональный кезеги Кизляр каласында 26-ншы октябрьде оьтеек. С.Сарсеев сонда ортакшылык этпеге деп энъ де белсенли балаларды сайлады. Олар-Д.Мамутов, Ю.Абдулсаметова (Кадрия атындагы школасы), Ю.Байгараева, А.Джумаева (А.Джанибеков атындагы школасы), А.Аблезова (Нариман авыл школасы),И.Янакаева (Орта-Тоьбе авыл школасы), Д.Култаева (Батыр-Мурза авыл школасы), Ф.Менлалиева (Кумли авыл школасы), А.Давлетова, А.Елгишиева (Эдиге авыл школасы), А.Оразакаева Карагас авыл школасы).

Сайланып алынган окувшылар Кизлярдагы конкурста ийги билимлерин коьрсетсе, оларга  Махачкалада оьтеек республикалык конкурсында катнаспага йол ашылаяк. «Яслык» яслар орталыгынынъ етекшиси оларга уьстинликлер йорап, оьз ойларын ийменмей айтпага деп маслагат берди.

Дагестан халкларынынъ татымлыгын беркитуьвге багысланган  тоьгерек стол  ийги оьтти. Балалар  уьшин ол  бек пайдалы болды.

Н.Кожаева.

Суьвретте: шарадан коьринис.

Янъыларда Дагестан Республикасынынъ Маданият министерствосында Россия Федерациясынынъ  Федераллык Йыйынынынъ Государстволык Думасынынъ депутаты Юрий Левицкий маданият министри Зарема Бутаева эм маданият учреждениелерининъ ведомстволык етекшилери мен йолыгысты. Йолыгыстынъ басында Ю.Левицкий «Единая Россия» Партиясыннан 9 депутат сырасында  ога етинши шакырувдынъ Государстволык Думасында Дагестан ериннен депутат болмага йогары сеним эткенлерине дагестан сайлавшыларга, соны ман Дагестан Республикасынынъ Аькимбасы Рамазан Гаджимурадович Абдулатиповка онынъ кандидатурасын яклаган уьшин уьйкен савбол айтты. Йыйылганларга ол аьр бир депутат оьзининъ сулыбына таянып, Государстволык Думасында уьйкен оьлшемде  оьзи пайда аькелмеге болган Комитетти сайлайды. Юрий Андреевич болса Маданият бойынша Комитетин сайлаган, сога коьре ол оьзининъ биринши депутатлык йолыгысын ДР Маданият министерствосында этти.

Йолыгыста маданият тармагындагы маьселелер акында айтылды: министерство эм муниципаллык маданият учреждениелерининъ катнасларын янъыдан кайтарув, «Лезгинка»  патшалык ансамбли уьшин  Биюв уьйин курув эм баскалар.

Юрий Левицкий баьри маслагатларды да  уьйкен эс берип тынълады. Ол мунда коьтерилген коьп соравлар савлай россия маданият тармагына келисли экенин, сога коьре олар Государстволык Думадынъ законопроектлеринде каралувга аьзирленгенин белгиледи.

Юрий Левицкий Государстволык Думасынынъ Маданият бойынша Комитетининъ председатели Станислав Говорухинди маданият тармагында Рамазан Абдулатиповтынъ баславы ман республикада  этилген уллы куллык пан таныстырды, бас деп Россия халкларынынъ аьдетли маданият орталыгын, элимизде бир ялгыз Поэзия театрынынъ курылувы акында. Бу сулып пан баска регионлар ман да боьлиспеге болады. Комитетте уьйкен кызыксынув ман Дербенттинъ 2000-йыллыгын озгарув акында билдируьвди тынъладылар.

Маданият министри З.Бутаева эм «Лезгинка» ансамблининъ етекшиси Д.Магомедов депутатка  йолыгыс уьшин, республикада маданияттынъ оьрленуьв соравларына эс эткени уьшин разылыгын билдирдилер эм ога депутат аьрекетинде уьйкен уьстинликлер йорадылар.

Белгиленген йолыгыста ДР Халк Йыйынынынъ депутаты А.Безрукова, маданият министрининъ орынбасарлары М.Гаджиев эм М.Мугадова, Дагестан маданият учреждениелерининъ етекшилери, Лак театрынынъ художестволык етекшиси Б.Магомедгаджиева, Орыс театрынынъ художестволык етекшиси С.Тулпаров эм баскалар.