ДР Ногай районынынъ 100- ден артык билимлендируьв учреждениелерининъ окувшылары Россия Федерациясынынъ Конституция куьнине багысланып «Белая ладья» деген шахмат ойыны бойынша турниринде ортакшылык эттилер.
Шара Ногай районынынъ Терекли-Мектеб авыл саьбийлер уьшин яратувшылык уьйинде озгарылды. Спорт ярысынынъ уйгынлавшылары «Яслык» деген яслар орталыгы эм районнынъ билимлендируьв боьлиги эдилер. Турнирдинъ мырады ийги мектеб куьбин белгилев, мектеб яслар арасында шахмат ойынын таралтув эди.
Ярыс район администрациядынъ билимлендируьв боьлигининъ методисти Б.Бекмурзаевтинъ етекшилеви мен оьтти. Район аькимбасы атыннан Сафар-Али Сарсеев баьри катнасувшыларды да Конституция куьни мен кутлады. Канасувшыларга ол аьдиллик пен куьресуьвди, енъуьвлерди, етимислерди йорады.
Шахмат бойынша турниринде шашка, шахмат ойынларын суьювшиси, Ногай районынынъ саьбийлер уьшин яратувшылык уьйининъ шахмат ойыны бойынша кружок етекшиси А.Шавалиев, ДЮСШ-2 етекшиси Т.Елакаев тоьрешилер болдылар. Турнир катнасувшылары 1-4-нши класслары, 5-8-нши класслары, 9-10-ншы класслары ясы бойынша уьш катламына боьлинген эдилер. Кызыклы ойыннынъ тамамы бойынша биринши орынга Бораншы авыл орта мектеби, экинши орынга Терекли-Мектеб авыл Джанибеков атындагы орта мектеби, уьшинши орынга Ленин авыл орта мектеби тийисли этилдилер.
Енъуьвшилерге кубоклар, Сый грамоталары, медальлер тапшырылды. Суьвретте:ярыс катнасувшылары.