Бу баргыдынъ тапшырылувы ийги аьдет болып бараятыр. Уьш йыл артта «Ногай Эл» радиостанциясынынъ баргысы бизим йырлавшыларымызга биринши кере тапшырылган эди.
«Ногай Эл» радиосынынъ куллыкшылары аз куллыклар этпейдилер. Туьрли аьдемлер мен хабарласувлар, йолыгыслар, язувшыларымыздынъ, поэтлеримиздинъ янъы асарлары, йырлары радио аркалы халкка еткериледи.
- «Ногай Эл» радио баргысынынъ тапшырылувы халкымызга уьйкен байрам, мунда катнасув, бизге – эфирде йырланатаган йырлардынъ авторларына (поэт болса да, композитор болса да) – уьйкен суьйиниш. Мен коьп авторлардынъ атыннан радио етекшиси Нурлыхан Аджековага, шарадынъ озувына спонсорлык ярдам этетаган эм уйгынлав куллыкларды озгаратаган Мухтарбий Аджековка уьйкен разылыгымды билдиремен, оьзим де радио куллыкшысы болганыма, бу куллыклардынъ уйгынлав амалларын коьремен. Элбетте, тынышлардан тувыл, аз карыж да шыкпайды,- дейди Салимет Майлыбаева.
Бу йыл да, аьдеттен таймай, «Ногай Эл» радиосынынъ баргысын тапшырылувга аьзирлик коьриледи. Сонда йырмадан артык йырлар йырланаяк.
- Шарады озгарувда йылдан- йылга сулып алатаган болсак та, биз кыйынлыкларга распай болмаймыз, оьзим де шара озбай турып, навасызланып тураман,- дейди Мухтарбий Аджеков.
«Ногай Эл» радиосында янъыдан-янъы проектлер ашыла береди.
- Сол ашылатаган проектлердинъ коьбисининъ авторы радио куллыкшысы Тумур Абдулжалилов болады, «Ногай Эл» радиосынынъ баргысы да онынъ проекти,- дегенди де мага алдынгы хабарласувымда сол ок коллективтинъ бир куллыкшысы айтканы эсимде калган.
«Ногай Эл» радиосы болсын, бизим газетамыз болсын, тувган тилди саклавшы органлардынъ бириси боладылар. Радиода эситилетаган йырлар, ятлавлар, газетада окылатаган макалалар аьдемлердинъ тил байлыгын оьстиреди. Солай болганда бизим тилимиз оьлимсиз, а тил болган ерде халк та миллет кебинде бар.
Г.Сагиндикова.
Суьвретте: оьткен йылда «Ногай Эл» радиосынынъ баргысына багысланган шара.