«Ногайский район» МО-сында КЦСОН тармагы бир неше йыл узагында белсен куллыгын юритип келеди. Сол йыллар ишинде коьплеген керексинген аьдемлерге оьзлерининъ тийисли ярдамын эткенлер.
Аьлиги заманларда керексинетаган эсли эм сакат аьдемлердинъ социаллык аьллерин ийгилендирер ниет пен социаллык куллыкшылар куьби ис аьрекетин бардырадылар. Бу инновационлык проект болады. Олардынъ бас мырадлары – заманы ман тийисли кепте аьр бир керексингенге ярдам этуьв.
Буьгуьнлерде куллыклар белсенли юритиледилер эм сол истинъ сырагыларын келтиргенде эсли аьдемлер социаллык куллыкшысынынъ ярдамында керексинетаганы коьринеди. Социаллык куьптинъ куллыкшылары эсли аьдемлердинъ уьйлерин йыйнайдылар, керекли ерлерде енъил ярастырув ислерди де этедилер. Бу социаллык куьптинъ куллыкшылары ялгыз яшайтаган эсли эм сакат аьдемлерге ярдам этпеге борышлылар. Олар оьз ислерин тегин аьлде эм бир кере керексинетаган гражданиннинъ аьризесине коьре этиледи. Бу йыл айтылган куьптинъ куллыкшылары Ногай районымыз бойынша 45 аьдемге ярдамын эткенлер. Сол санда Терекли- Мектеб авылыннан -сегиз, Нариманнан- бес, Червленные Буруныдан -алты, Орта- Тоьбеден -сегиз, Карагастан- он, Куьнбатардан- доьрт, Кумлыдан -уьш, Батыр- Мурзадан бир аьдемлер бар.
Социаллык куллыкшылар куьби деген инновационлык проекти яшавга шыгарылув уьстинде ОСО етекшиси Менглихан Картакаева аьрекет этеди.
Бу ерде белгилеп озбага керек болады, исимиз йылдан –йылга белсенленеди. Бизим исимизде тийисли куллыкларды кайдай аьдемлер этетаганы бек маьнели болады. Сол аьдемлер юмсак касиетли, туьз ниетли болмага кереклер. Олардынъ ярдамы аркалы, яшавдынъ кыйынлы аьллерине туьскен аьдемлер, тынышлыкты, йылувлыкты сезбеге кереклер.
Эгер сиз социаллык куллыкшыларынынъ ярдамында керексинетаган болсанъыз, сизди КЦСОН-нынъ боьлик етекшилери тынъламага эм ярдамга келмеге аьзирлер яде 89280536834 номерли телефонга тел сокпага боласыз.
Биз ярдамга аьзирмиз.
М.Ярикова,
социаллык канагатлав боьлигининъ етекшиси.