Дослык белгиси
2017-нши йылдынъ шилле айынынъ 30-ншы куьниннен алып сары тамбыз айынынъ 14-нши куьнине дейим Дагестан, Шешен, Ингушетия, Сырт Осетия-Алания, Кабарты-Балкар, Карашай-Шеркеш, Адыгея, солай ок Кубыла Осетия Республикаларында «Дослык белгиси. Кавказ башнялары-2017» деп аталып, халклар ара дослыкты беркитер ниет пен, Россия ясларынынъ маданият-тарих проекти яшавга шыгарылады.
Сол проект ишинде Москва каласыннан эм кавказ республикаларыннан волонтерлар (студент куьплерден туьзилген) билимли специалистлердинъ етекшилеви мен тарих эм маданият асабалыклары – белгили кавказ башняларын эм беркитпелерин саклав эм туьзетуьв уьстинде куллыклар юритееклер. Аьр бир регион власть органлары эм яшавшылары оьз ерлерининъ ярасыклыгын коьрсетееклер. Сол проект негизинде – «Оьз ыхтыярлы исинъ ярыкландырув уьшин» деген шакырув астында оьткериледи.
Проектинъ бас мырады: Россия халкларынынъ миллетлер ара катнаслыгын беркитуьв, Кавказдынъ тарих-архитектуралык маданиятын саклав.
Шилле айынынъ 30-нан алып сары тамбыз айынынъ 7-нши куьнине дейим, бир юма узагында, проект бойынша катнасаяк доьрт интернационал куьплердинъ биреви Дагестан Республикасында болып, сондагы туьрли миллетли халклар ман, олардынъ аьдетлери мен танысып. Оьз ойлары ман туьрли социаллык тармакларда, СМИ-лерде боьлисип тураяклар. Бизим республикада бир юма узагында оьз куллыкларын эткеннен сонъ, сол куьп Кубла Осетияга ис аьрекетлерин бардырмага кетееклер. Бу проектинъ тамамы «Машук -2017» Сырт-Кавказ яслар форумында келтирилеек.
Проектти «Ийгилик пен йылыт» саваплык фонды, «Дослык белгилери» яратувшылык бирлесуьви, Россия Федерациясынынъ Орталык союзы уйгынлаганлар. Проектти РФ Президентининъ Администрациясы колтыклавы ман, Президент грантынынъ амалламаларыннан карыжлав ман, миллетлер ара катнаслыкты беркитер ниет пен озгарадылар. Проекттинъ бек уьйкен социаллык эм ямагатлык маьнеси бар.
Г.Сагиндикова