Йыйын

Бу юма да «Ногайский район» МР-нында аьдетли аппаратлы йыйыннан басланды. Йыйын алдында «Ногайский район» МР администрациясынынъ Контрактлы управляющийи Ислам Мамутов ис аьрекетине коьре этилген куллыкларынынъ сырагыларын келтирди. Онынъ соьйлевине коьре соравлар да, яваплар да болдылар. Уьйкен маьне билимлендируьв учреждениелеринде балалардынъ тамакланувына алынатаган азык-туьлик продуктларынынъ бааларына берилди. «Ногайский район» МР аькимбасы М.Аджековтынъ соьйлевине коьре, биз баслап, оьз фермерлеримизди колтыкламага керекпиз, олардан рынок баасы ман керекли продукцияды алсак аьруьв болаяк эди.

Я.Кудайбердиев те йыйылганлар алдында маданият бойынша ис сырагыларды келтирди. Оьзининъ йоравларын да, тийисли насихатларын да айтып кетти.
Приоритетли проектлер бойынша аьр бир тармакка тийисли борышлар берилгени акында «Ногайский район» МР аькимбасынынъ орынбасары Х.Саитов билдирди эм буьгуьнлерге дейим сол борышлар толтырылмаганы акында да айтты.
Билимлендируьв тармагынынъ етекшиси К.Отегенова район школаларымызда балалар азлыгыннан бир неше класс окувшыларын биргелес окытпага туьсетаганын билдирди. Соны ман байланыста школаларымызда саьатлер де азаядылар, окытувшылар да куллыксыз каладылар. Бизим кийкей санлы халкымызга ол уьйкен маьселе. Йыйын барысында балалардынъ аз болувынынъ да бир неше мысаллары келтирилди.
Г.Сагиндикова.