Мерекеши акында___________
Ногайымда бир аьруьв такпак бар: «Агасы бардынъ ягасы бар, иниси бардынъ тынысы бар» деген. Ол мага бек ярайды эм, дайым да, татым яшайтаган, бир-бирине аркав болып юретаган аданасларды коьрсем, атайлар соьзи калай акыйкат деп ойлайман. Сондай агалы-инилер, сондай тыпак аданаслар акында буьгуьн оьз соьзимди айтпага суьемен.
Куьнбатар авылда Караевлер тукымы – ийги аты ман белгили тукым. «Муса Караев – Уллы Аталык согыс юзин коьрген, басыннан не де кеширген эр киси, согыстан аман-эсен кайтып келип, кара куллыктан коркпай ислеп баслаган, билимге ымтылысы куьшли болган, заманында уьйкен молла болган», – дейдилер авылдаслары.