Медицина куллыкшылары баьри халклардынъ эм заманлардынъ баьтирлери. Олар аьр куьн сайын йигитликлер этедилер: аьдемлердинъ яшавларын куткарадылар, эмлейдилер, авырыганларга сеним бередилер. Бу куьнлерде савлай дуныядынъ врачлары ман бирге районымыздынъ медицина куллыкшыларына да юкпалы коронавируслы маразы ман куьреспеге туьседи. Ак халатлыларга кешелерде уйкламай, оьзлерининъ аьеллерин калдырып, оьз ден савлыгын эм яшавын сынавга салып авырыганларга ярдам этпеге туьседи.
ДР Савлык саклав министерствосынынъ пресс-службасы билдиргенлей, аьли республикамыздынъ больницаларына внебольничная пневмония ман эм коронавируслы юкпалы маразлы деп шек тувдырган 100-ден артык авырыган аьдем туьскен.
Курал айдынъ 12-нши куьнинде Савлайроссиялык медсестралар куьни белгиленди. Медициналык куллыкшылардынъ иси дуныяда маьнели эм керекли кеспилердинъ бириси деп саналады. Пандемия заманында олар оьз кайратлы куллыгы ман баьтирлигин коьрсеттилер. Кыйынлы заманда оьз кыйынын, керек болса, яшавын да аямай, медициналык сестралар коьплеген авырувлыларды оьлимнен куткарганлар.
Бу юмадынъ дуьйсемби куьнинде «Ногайский район» МР администрациясында болып озган йыйында Ногай орталык больницасынынъ етекшиси Фаризат Межитовадынъ билдируьвине коьре, коронавируслы маразы бойынша аьллер бу куьнлерде ийгилерден тувыл.
Район бойынша вакцинация юритилип туры. Сол сорав бойынша билдируьвди Ногай район орталык больницасынынъ бас врачы Фаризат Межитова «Шоьл тавысы» республикалык газетасына берди. Онынъ айтувы ман, район яшавшылары коронавирустан вакцина алып турадылар. Солардынъ ишинде 60 ястан озганлар коьп, сол зат бизди суьйиндиреди. Коьплеген аьризелер авыллардан туьседилер, сога коьре медициналык куллыкшылар район авылларына бараяклар.
Коронавируслы маразынынъ пандемиясы басланганнан алып Ногай районымыздынъ орталык больницасында ети юзден артык аьдемлер эмленуьв алганлар. Олардынъ савлыгын саклар уьшин Ногай орталык больницасынынъ медициналык куллыкшылары коьп куьш салдылар.
Савлай республика бойынша «Спутник V» препараты ман вакцинация озгарылады. Ногай район орталык больницасында 200 артык аьдем вакцинация оьткен. Навруз айынынъ 29-ншы куьнинде районга вакцина аькелинди. Биринши болып коронавирустан вакцинацияды ясуьйкенлер оьтип басладылар. Солардынъ ишинде – «Шоьл тавысы» республикалык газетасынынъ яваплы секретари Любовь Уразаева эм корректоры Азинет Башиева.
2021-нши йылдынъ навруз айынынъ 21-нши куьнине Ногай ЦРБ-да коронавируслы юкпалы маразлыларды эмлев уьшин курылган госпитальде 3 аьдем эмленеди. Авырыганлар больницага туьскендей болса деп, 5 ятар орын аьзирленген.
Врачлардынъ эл арасында сыйы кайсы заманларда да уьйкен болган. Оларга авырыган аьдемлер уьйкен сеним мен карайдылар. Врачлар оьзлерининъ яшавын аьдемлерди эмлевге эм ярдам этуьвге багысламага аьзир инсанлар. Олар аьдемнинъ энъ де баалы – яшавы уьшин яваплылыкты оьз мойынына аладылар. Аьлиги тыныш болмаган, янъы коронавируслы юкпалы маразынынъ пандемиясы савлай дуныяды бийлеп алган заманда врачлар оьзлерининъ яшавынынъ...
