Дагестан Аькимбасынынъ куллыгын юритуьвши Федор Щукин "Дагестан командасы" кадрлар программасы басланганы акында билдирди.
- Бу программа - кадрларды айырув бойынша ашык, анъламлы тармагы. Мунда ишки соьйлесуьвлер эм "оьз аьдемлер" болмаяк,- деди регион басшысы.Меним ойыма коьре, бу заманы ман эм бек маьнели проект. Республикадынъ оьрленуьвине куьшин салып, билимли, бажарымлы аьдемлер ислемеге керек. Олар Дагестанды ийги, куьшли этип болаяклар.
Мен ойлайман, республикады мектеблерди битирип, элимиздинъ туьрли окув ошакларында окыган ясларымыз эм кызларымыз коьтермеге тийисли. Дагестанга йогары квалификациялы специалистлер керек. Сонынъ акында ДР аькимбасынынъ куллыгын юритуьвши Федор Щукин де айткан.
-Бизге янъы заман ман бирге абытлайтаган, коьзлери янып турган куьшли специалистлер керек, - деди ол.
Федор Щукин ЕГЭ сынавларында йогары коьрсетуьвлер берген выпускниклер мен йолыгысувында оларды окувын битирген сонъ киши Аталыгына шакырды.
"Дагестан командасы" программасы республикамыздынъ аьли де белсен оьрленуьвине каратылган биринши абыт болады. Дагестан командасы алдында янъы борышлар эм перспективли мыратлар салынаяк, олар заманы ман бажарымлы аьлде толтырылаяклар.
Биз, Дагестан яшавшылары, республикамыздынъ басшысы алып баратаган курс дурыс эм Дагестан онъайлыгына каратылганына шекленмеймиз. Биз, журналистлер, программадынъ яшавга шыгарылувы ман окувшыларды таныстырып турармыз.