«Яназы калай болар экен?» Яваплайды Ногай район имамы

Ассаламу аляйкум, оьрметли халкым!

Тилеймиз сизге, савлык саклав органлары, оькимет, имамлар беретаган маслагатларга маьне берейик эм мундай мараз яйылып турган заманда дуаларда ас асувды токтатып турайык.

Аллаh Та’аля бизге ас асувды борыш этпеген, ама борыш эткен савлыкты сакламага. Доктырлар айтканлай, бизим дуасларда маразга яйылмага уьйкен себеп бар. Сога коьре, эгер бизим дуаста мараз яйылып, аьдемлер авырыса, биз эткен садакадан эм садака астан кайдай савап болар? Садака этпеге суьйген аьдемге, мал сойып, этин осал яшайтаган аьеллерге пайламага ыхтыяры бар.

«Яназы калай болар экен?» — деп сорав бередилер. Аьдем тыншайганда, Аллаh Та’аля бизге доьрт зат борыш этеди:
1. Мейитти ювындырмага
2. Мейитти аьруьвлемеге (кепинге орамага)
3. Яназы намаз кылмага
4. Оьликке элтеп коймага (коьммеге).

Бу доьрт затты биз койып болмаймыз, ама мунда да шалысайык тек ювык тувганлары болсын деп.

Келгенлерге шай берилмесин. Азбарга киргенде саламын тек авызы ман айтып, Альхамын берип (кол алыспай), кеш калмай шыксынлар. Заманы келгенде, энъ де ювыклары ман бирге имам Куран окып дуа этсин. Сонъ яназы намазын кылып, оьликке барып, мейитти коямыз. Кеште Куран окувда да тек ювык тувганлары болсын.

Аявлы ямагат бу айтылган соьзлер бизим савлыгымыз уьшин. Айтылган маслагатларга терен маьне берейик. Аллаh Та’аля оьзи бизге коьмекши болсын бу маслагатларды тутпага. Кудай бизди Оьзи сакласын бу мараздан.

Ногай районнынъ имамы                       Мухаммад Атангулов.