Райме Картакаева 2006-ншы йыл Терекли-Мектеб авыл школасын экстерн кебинде кутарып, Астрахань каласындагы медицина академияга окымага туьседи. Медакадемияды кутарган сонъ, Махачкалада ветеранлар госпиталинде терапия бойынша интернатурады оьтеди. Сонъ яс специалист элимиздинъ бас каласы Москвада поликлиникада терапевт болып ислейди.
Мине 2014-нши йылдан бери Райме Умархан кызы Шешен Республикасынынъ Шелков районынынъ орталык больницасында куллык этеди.Бас деп ол онда терапевт болып ислеп баслады, бу куьнлерде ол райтерапевт: янъы дереже мен, оьзек те, куллык коьбейди, Картакаевадынъ мойнында диспансеризация, ис эм согыс ветеранлар ман куллык этуьв эм баскалай да явап-лылык арткан. Ама Райме Умархан кызы кыйынлыклардан коркпай, оьзине тапшырылган куллыкты йогары дережеде толтырып уьйренген. Сонынъ уьшин де ол больницадынъ етекшилери, коллектив арасында сый ман пайдаланады. Олар онынъ куллыгына, аьдемшилигине уьйкен баа бередилер. Орталык больницадынъ етекшилери аттыннан Сый грамоталарга, мактавларга, разылыкларга тийисли болган. Бу йыл Райме Картакаевадынъ исине республикалык оьлшеминде де эс этилди: ол Шешен Республикасынынъ Савлык саклав министрининъ атыннан «Кайратлы иси уьшин» деп язылып, Сый грамота ман савгаланды.
Мен Райме Умархан кызы ман йолыгып, оннан оьзининъ куллыгы, ислейтаган больница, коллектив акында сораганда:
– Баьринъиз де билесиз, бизим куллык – тынышлардан тувыл. Энъ де маьнелиси: биз аьдемнинъ энъ де баалы байлыгы – савлыгы алдында яваплы. Сонынъ уьшин де сол яваплыкты акламага шалысасынъ. Бизим больницамыздынъ меканы заман талапларына яваплайды, эмлев алатлар ман болган шаклы канагатланган. Айтпага, УЗИ, ЭКГ, компьютерлик томография эм коьплеген баска алатлар бар. Коллективимиз билимли, тыпак, бир-бирисине тирев боладылар. Коллективтинъ сондай етимисинде, кылыгында бизим больницадынъ бас врачы Роза Джолуевна Матаевадынъ да уьлиси уьйкен де санайман, неге десе ол оьзи де – билимли специалист, уста уйгынлавшы эм ийги аьдем.
Райме Картакаева оьзининъ соьйтип, медицина академияды кутарып, врач болып ислеп турганы уьшин разылыгын атасы Умарханга, анасы Альфирага айтады. Онынъ айтувы ман, олар болмаган болса, окувды кутармага бек кыйын болаяк эди.
Аьне соьйтип тийисли кепте куллык этеди бизим авылдасымыз, кызымыз Райме Умархан кызы Картакаева Шешен Республикасында. Шалысып ислейди, кыйын аьлге туьскен, авырыган аьдемлерге коьмек керек экенин анълап. Ийги ислеви мен оьзининъ абырайын да, халкынынъ абырайын да коьтереди.
М.КОЖАЕВ.
Суьвретте: Р.Картакаева (солдан уьшинши) ис йолдаслары ман.
