Онынъ айтувы ман, белгиленген приоритетли проекти аьлиги заманда республикада яшавга шыгарылып турган баьри приоритетли проектлери арасында тармак туьзуьвши деп саналады. Олай дегени, етекшилев тармагы нешаклы хайырлы этип туьзилгени мен республикадынъ эм патшалыктынъ оьз ис борышларын толтырувы тар байланыслы.
Толстикова белгилегенлей, быйыл проектти яшавга шыгарув соравлары Халк Йыйынында ойласылган, депутатлар приоритетли программадынъ яшавга шыгарылувынынъ сапаты бойынша коьплеген ой-токтасларын айтып билдиргенлер. «Биз ямагат советин, проектти яшавга шыгарув аьсеринде йолыга туратаган маьселелерди, соравларды шешуьв уьшин йыйнаганмыз. Ол зат боьтен де аьли, келеектеги йылга борышларды белгилев басланатаган заманда, айлак та маьнели», – деп белгилеген ол.
«МФЦ аркасы ман халкка ярдамлар этуьв» деген приоритетли проектининъ яшавга шыгарылувы акында «Дагестан Республикасында МФЦ» деген ДР ГАУ персонал ман куллык юритуьв бойынша директорынынъ орынбасары Марина Вагабова билдирди. Онынъ соьзине коьре, МФЦ-лар ашылганнан алып, республикада коьп функционаллы орталыклар тармагын оьрлентуьв борышы салынган эди. Буьгуьнлерге республика бойынша баьри муниципалитетлерде де 57 МФЦ-лар эм 435 ТОСП-лар туьзилгенлер, ол 98 процент болады.
Буьгуьнлерде республикадынъ узактагы районларында МФЦ ваькилликлери йок экени акында республика депутатлары ман эртеректе сорав коьтерилгени акында белгиледи Е.Толстикова.
«Электронлы Оькимет» деген проектин яшавга шыгарув акында ДР коьлик, энергия эм байланыс министерствосынынъ электронлы оькиметин эм патшалык ярдамларын оьрлентуьв управление начальниги Аскандар Магомедов хабарлады. Онынъ айтувы ман, сол проектке бир неше боьликлер киреди. «Сонынъ санында – Дагестан Республикасынынъ электронлы документ айланысынынъ ведомстволар ара тармагын оьрлентуьв, патшалык эм муниципаллык ярдамларын этуьв эсабында ведомстволар ара электронлы биргелес аьрекетлев тармагын оьрлентуьв, электрон кебинде патшалык ярдамларын беруьв амалларын канагатлав,
ЕСИА-да эсапка алынган эм электрон кебинде патшалык эм муниципаллык ярдамлар механизмин кулланатаган гражданлар санын арттырув», – деп билдирди ол.
Йыйыннынъ барысында солай ок «Пайдалы патшалык эм муниципаллык сатып алувлар», «Пайдалы кадрлар политикасы», «Муниципаллык НПА-лардынъ закон нормаларына келисуьви», «2017-нши йылга ДР толтырувшы власть органларынынъ аьрекетине Ашык Оькимет принциплерин киргистуьв» деген подпроектлерди яшавга шыгарувдынъ юриси акында шыгып соьйлевлер тынъландылар.
Йыйыннынъ сырагылары бойынша ойласылган соравлар акында бир неше маслагатлар туьзилди, соларды Совет агзалары оьз куллыгында ойласып караяк.
