Келген конакларды «Ногайский район» МО администрация аькимбасы М.Аджеков хош алды эм районымызда Сбербанк офис- филиалынынъ ашылувы кайдай маьнели экенин белгиледи, районга аьли де бир неше банкоматлар керек, неге десе бир банкомат савлай район яшавшыларын аьжетсизлеп болмайды.

– Сбербанк эм район яшавшылары арасында болатаган соравларды шешуьв уьшин ис куьбин туьзбеге керек. Буьгуьн Сбербанк бизим районга кирмеге эм онлайн ислерин этпеге аьзир, – деп соьйледи район басшысы.

Сбербанк куллыкшылары ашык кепте оьз иси акында хабарладылар, кайтип онлайн бойынша тоьлевлер этпеге, коммуналлык буйымлар, ГИБДД штрафлар, госпошлина тоьлемеге, кредит алмага болатаганын анълаттылар. Айырым кепте олар балалар бавынынъ етекшилери мен соьйледилер, оларга аьр бир балалар бавына терминал салып, ата-аналар тоьлевлерин онлайн бойынша йибермеге маслагат этилди.

Банк куллыкшылары йыйналганлардынъ соравларына явап бердилер, оьз ягыннан район етекшилери олар ман биргелесип ислеегине аьзир экенин айттылар. Коьплеген керекли билдируьвлер келгенлер алды, керек болса, мунда келип, «Финанс билимининъ дерислери» деген шара озгармага болаякпыз деп айттылар. Келеекте районда Сбербанк офис-филиалы ашылар деген сеним айтылды.

Йолыгыс кызыклы эм маьнели болып озды.

Г. Бекмуратова. Суьвретте: йолыгыс озгарылув мезгили.