Эстеликке амаллар элимиздеги савлай юридический эм физический лицоларыннан йыйылаяк. Мемориаллык комплекслери халк пан йыйналган карыжларга салынаяклар.

Краснодар крайынынъ Муьлк катнасувлары бойынша департаменти Тамань районында мемориаллык комплекслерининъ тек биревининъ курылысына 1 гектардан артык ер майданын шыгарган. Аьлиги заманда Керч каласынынъ районында экинши комплексининъ курылысына да ер каралады. 1941-нши йылдан алып 1945-нши йылга дейим элимизди РФ регионларынынъ яшавшылары коршалаганнан себеп, мемориалларда элимиздинъ баьри регионларынынъ байраклары эм герблери, Россия Федерациясынынъ баьри субъектлерининъ композициялары коьрсетилееклер.

Баска болып, онда Уллы Аталык согыс данъкынынъ музейи де туьзилеек. Сондай савлайроссиялык кенълиги болган мемориаллык комплекси СССР заманларыннан алып курылмаган. Оьз ыхтыяры ман этилген саваплык карыжларына курылаяк эстеликлер шынты халктыкы болаягына соьз йок.