21-нши тамбыз – Медицина куллыкшысынынъ куьни___________________

Фаризат Янибек кызы Межитова 1966-ншы йылдынъ карагыс айынынъ 8-нши куьнинде Ногай районынынъ Терекли-Мектеб авылында тувган. 1982-нши йыл ерли мектебти битирип, Дагестан патшалык медициналык институтынынъ «лечебное дело» факультетине туьседи эм уьстинликли битиреди, интернатурасын Кизляр каласында терапия бойынша оьтеди. Сонъында Ногай район больницасында терапия боьлигининъ етекшиси болып ислейди, сол йыллар Фаризат Янибек кызы райтерапевт болып, сав район терапия службасын басшылайды. 2011-2017-нши йылларда эмлев бойынша район больницасынынъ бас врачынынъ орынбасары болып куллык этеди. 2017-нши йылдынъ карагыс айыннан алып Ногай район орталык больницасынынъ бас врачы болып аьрекетлейди. Фаризат Янибек кызы Межитова – «Дагестан Республикасынынъ ат казанган врачы», «Ямагат ден савлыгын эм савлык саклавды уйгынлав», «Терапия», «Кардиология», «Физиотерапия» бойынша аьрекетлейтаган сертификатлардынъ иеси. Ногай районынынъ савлык саклав тармагынынъ оьрленуьвине оьз уьлисин косканы уьшин ол Дагестан Республикасынынъ Аькимбасынынъ Сый грамотасы ман савгаланган. Фаризат Янибек кызы ян йолдасы Умарбек Межитов пан эки кыз тербиялап, яшав йолына салдылар. Кызлары Динара эм Диана оьз аьеллерин курып, бактысын бардырадылар. Кызлар экеви де анасынынъ йолын алып, врачлар болып ислейдилер.

Фаризат Янибек кызы Межитова кеспи байрам алдында оьз коллективининъ иси, кыйынлы аьллерде кайтип аьрекетлегенлери акында газета окувшылары ман боьлиседи.

Э.Кожаева,
«Шоьл тавысы» республикалык газетасынынъ бас редакторы.

Биргелесип, баьри кыйынлыкты да оьттик

Йыл сайын тамбыз айдынъ уьшинши каты куьни медициналык куллыкшысынынъ кеспи байрамы деп белгиленеди. Дуныяда медицина тармагы ман байланыслы болмаган аьдем йок болса ярайды. Медицина куллыкшыларга инсанлар энъ де баалы – оьзлерининъ эм ювыкларынынъ ден савлыгын сенедилер. Сол сеним врачлардан берк билим, бажарымлык эм ийги аьдемшилик касиетлерин талаплайды.

Быйыл баьримизге де кыйынлы йыл болды. Увыт айында Дагестан Республикасынынъ савлык саклав министерствосы ман бас врачлар арасында кавыфлы инфекциялар болганда, эпидемияга карсы шаралар озгарувга, авырувдынъ кайтип оьтетаганын, кайтип эмленетаганын билуьвге аттестация озгарылды. Солай ок керекли заманда эпидемияга карсы госпитальлер уйгынлап болув, куллыкшылардынъ сондай аьллерде ислеп болувы, керекли дарманлардынъ, байыр коршаланув амалларынынъ барлыгы тергелди. Баска регионларда коронавируслы инфекция эрте басланганына коьре, бизде вирус пан куьресуьвге аьзирлик коьрмеге заман бар эди – керекли дарманлар эм баска коршаланув амаллар алынды, медициналык куллыкшыларга кийимлер, маскалар, колгаплар эм сондай баска затларды алдык. Куьн сайын врач-инфекционист эм эпидемиолог медициналык персоналы ман профилактикалык шаралар озгаратаган эдилер.

Коронавируслы инфекция энъ де баслап бизим врачлардынъ, медсестралардынъ, санитаркалардынъ аьдемшилик касиетлерин тергев, йогары кеспиликке, ис борышын толтырувга, яваплылыкка сынав болды. Мен оьктемлик пен айтаман, бизим медицина куллыкшыларымыз оьзининъ йогары кеспилигин коьрсеттилер. Кыйынлы заманда бизим коллектив биргелести эм оьз кеспилик борышларын намыслы кепте толтырды, сол кеспиликти авырувлылардынъ эмленуьвининъ сырагылары коьрсетип туры буьгуьнлерде.
Коронавируслы инфекция ман авырыган биринши аьдем бизге 24-нши коькек айында туьсти. Биз сонда ок инфекциялы госпиталь курдык. Соны ман стационардынъ 107 орыныннан 90 орын коронавирус эм вируслы пневмония ман авырыйтаганларга берилген.

Белгиленген болжал ишинде больницага коронавируслы инфекция эм пневмония ман авырып, 212 аьдем туьскен. Аьлиги заманда госпитальде 45 авырувлы эмленеди, уьйде эмленуьвде 117 аьдем бар.

Мен ак юректен оьз разылыгымды Ногай районынынъ администрация аькимбасы Мухтарбий Кошманбет увылы Аджековтынъ етекшилеви астында аьрекетлейтаган Оперативли штабка айтпага суьемен. Бу кыйынлы заманда район организациялары биргелестилер – Ногай районынынъ РОВД боьлиги, Билимлендируьв управлениеси, Роспотребнадзор, авыл поселениелер аькимбаслары. Уьйкен куллык дин аьрекетшилери мен этилинди, имам М.Атангулов яшавшылар ман бек ийги куллык юритти.

Мен медициналык куллыкшыларын кыйынлы куьнлерде коьтергишлегенлерге де савбол айтпага суьемен. Билимлендируьв управлениесининъ, Ногай драмтеатрынынъ, маданият куллыкшылары, сизинъ флешмобларынъыз бизге ийги ислемеге куьш бердилер. Айырым савбол айтаман саваплык фонды «Инсанга», Хатын-кызлар союзына, район администрациясына, байыр предприниматель Хайрудин Бекбулатовка «кызыл зонада» ислейтаган медициналык куллыкшыларына азык-туьлик аькелгени, «Балалар коршалав куьнинде», «Россия куьнинде» бизди коьтергишлегени уьшин.

Медициналык куллыкшыларынынъ куьни тек врачлардынъ байрамы тувыл, бу байрам медсестралар, фельдшерлер, киши персоналдынъ байрамы, неге десе бир дарман да, энъ де куьшли алат та аьдемнинъ йылы каравын, ийги соьзин авыстырып болмайды.

Мен оьзим етекшилейтаган райбольницадынъ баьри боьликлери де биргелесип ислегенин белгилемеге суьемен – эмлев иси бойынша бас врачтынъ орынбасары З.Куруптурсуновадынъ етекшилеви астында стационар боьлиги, М.Арслановадынъ етекшилеви астында поликлиника, ОМР бойынша бас врачынынъ орынбасары З.Шугаиповадынъ етекшилеви астында участковый больницалар, фельдшер-акушер, фельдшер пунктлар, инфекциялык эм эпидемиологиялык службалар.

Бу болжалдынъ ишинде коьплеген медициналык куллыкшылар да авырдылар, ама олар сав болган сонъ, «кызыл зонага» тагы да баратаган эдилер. Сол зат меним, етекшидинъ, юрегимде оьктемлик эм сукланув сезимлерин тувдырады.

Меним ис йолдасларым, сыйлы меним коллективим, мен сизге яваплылык пан исинъизди толтырганынъыз уьшин, оьз кеспинъизге алаллык уьшин, авырувлыларга ийги караганынъыз уьшин савбол айтаман. Сиз баьринъиз де бизим районымыздынъ ден савлыгын саклап ислейсиз. Коьплеген медицина куллыкшылар кеспи байрамын «кызыл зонада», оьз ис орынларында байрамшылаяклар.

Байрам куьнинде мен бизим сыйлы ясуьйкенлеримизди эсиме алмай болмайман. Олар буьгуьн тийисли тыншаювда, ама олардынъ маслагаты, ийги соьз бен бизди коьтергишлеви кайдай бизге маьнели. Бизим насихатшыларымыз Ахмат Сулейман улы Арслановты, Асрет Сарсей кызы Абдурахмановады, Зармухамед Кумар улы Балигишиевти, Светлана Бадий кызы Гапаровады, Кайтархан Отеген кызы Баймурзаевады, Сакинат Казу кызы Шураевады, Авархан Мезей кызы Оразалиевады, Таймас Кантемир улы Тенгизовты, Зоя Зейнадин кызы Кулунчаковады, Байрамбике Камал кызы Кельжановады, Кизлярхан Мауш кызы Асановады эм медицина тармагында ислеген коьплеген йолдасларымызды кеспи байрам ман кутлап, берк ден савлык эм узак оьмир йорайман.

Бу байрам куьн мен оьктемлик эм йылувлык пан больницамыздынъ аьр бир куллыкшысын кутлайман. Сизге ден савлык, таза аспан, куллыгынъызда уьстинликлер эм авырувлылардан разылык соьзлерин йорайман. «Дагестан Республикасынынъ ат казанган врачы» деген сыйлы атка Зульфия Муртазали кызы Шугаипова тийисли болган. Солай ок терапия боьлигининъ медсестрасы Арюзат Тимирмагомедовна Оракова «Дагестан Республикасынынъ ат казанган савлык саклав куллыкшысы» деген атты байырлаган. Мен оларды сондай сый ман кутлайман, аьли де бийикликлер йорайман.

Ф.Межитова,
Ногай район орталык больницасынынъ бас врачы.