«Ала-куба кумлар, коьп коьрген адырлар…»

Червленые Буруны авыл маданият уьйинде бу шарадынъ озгарылувы да босына тувыл. Ол сол авылда тувып-оьскен. 
Шарада баьриси 14 авыл ерлериннен йырлавшылар катнастылар, олардынъ аьр бириси оьз авыл маданият уьйин яклады.  
Шарада Залимхан Зинеевтинъ анъ салган «Баьтир койшылар», «Ногай вальс», «Буйратлар», «Ата юртым», «Ногай шай», «Шоьлим сен», «Данъылым» эм сондай баска йырлары эситилдилер. 

Шара катнасувшыларынынъ йырлап болув оьнерлерин ДР ат казанган маданият куллыкшысы, РЦБ етекшиси С.Абубекерова, «Айланай» ансаблининъ художестволык етекшиси М.Ваисов, анъ етекшиси А.Межитов белгиледилер. 

Шарадынъ тамамына коьре биринши орынга Червленные Буруны авыл маданият уьйи «Баьтир койшылар» йыры ман (сол йырды Сабират Абдулсаламова йырлады) тийисли болды. Экинши орынды Карагас авылыннан Анипет Сагиндикова «Буйратлар» йырын йырлавы ман алды, уьшинши савгалы орынга Куьнбатар авылдынъ йигити Сейпулла Янполов «Ногай вальс» йырды йырлавы ман тийисли болды. 

Бу куьн савгалы орынларга тийисли болган йырлавшыларга сый грамоталар ман акшалай савгаларды Червленые Буруны авыл басы Артур Арсланов тапшырды. Солай ок миллет аьдетлер эм маданият оьрленуьви бойынша орталыгыннан да грамоталар ман акшалай баргылар берилдилер. 
Залимхан Зинеевтинъ яратувшылыгына багысланган шара бек йылы аьлде оьтти, шарадынъ барысында талаплы композиторымыздынъ кардаш-ювыклары да йылы соьзлерин айттылар. Баска шара катнасувшылары да белгиленмей калмадылар, аьр бирисининъ коьнъили табылды. 
Аьр бир маданият уьйи З.Зинеевке багысланган рефератын, плакатын аьзирлеген эди. 

Шарадынъ сондай ийги аьлде оьтуьвине Червленые Буруны авыл аькимбасы Артур Арсланов аз куьш салмады. Ога уьйкен ра- зылыгымызды билдиремиз, неге десе биз сондай маданият шараларды оьткерип, оьзимизде болган талаплы аьдемлеримиздинъ атларын оьмирлендиремиз.
Шарады усташа Бурлиант Курманова ман Гульфия Кокоева юриттилер. 

Н.Халилова.
Суьвретте: шара катнасувшылары.